DUMAGUETE CITY, Negros Oriental, Jan. 11 (PIA) — Nigahin og P2.1 million nga pondo ang Kagamhanan sa Dakbayan sa Dumaguete alang sa pagapod-apod og masustansyang kalan-on sa mga bata ug mga inahan.
Subay sa Dietary Supplementation Program (SDP) sa City Nutrition Council, hatagan og fresh milk, mga init na pagkaon, mga vitamin-rich food sama sa Nutribun, ug mga bitamina ang mga bata ug mga nagpasuso nga mga inahan sa tanang barangay.
Giaprubahan sab ni Mayor Felipe Remollo ang pagpalit og karne, mga utanon, fortified rice porridge o lugaw, fresh milk, ug vitamin-rich food gikan sa Nutrition Center of the Philippines na maoy ihatag sa mga benepisyaryo sa maong programa.
Matud ni City Nutrition Officer Delia Serion, modagan og upat ka bulan ang SDP na naglangkob og mga complimentary ug supplementary feeding program.
Adunay complimentary feeding program ug multivitamin provision alang sa mga bata nga edad sais hangtod to 59 months old, supplementary feeding ug milk feeding programs alang sa mga bata na 25 to 59 months old.
Duna usa’y inadlaw na feeding alang sa mga nutritionally at risk women.
Ang mga barangay nutrition worker ang mokuha sa suplay sa pagkaon didto sa City Nutrition Office samtang ang paluto sa hot meals adto ipahigayon sa mga barangay health center.
Human niini ihatod na ang mga pagkaon sa tagsa ka panimalay sa benepisyaryo sa SDP.
Ang direktang paghatod sa mga masustansyang kalanon sa matag panimalay ang nakitang maayong istratehiya sa lokal na kagamhanan alang sa pagsugpo sa malnutrisyon. (RAL/PIA7 Negros Oriental with reports from City PIO)
