BACOLOD CITY (PIA) — Padayon ang pagpanghanda sang Office of Civil Defense (OCD) sa posible pagpataas sang Alert Level sang Bulkan Kanlaon.
Bangod sa aktibidad sang bulkan sang nagligad nga mga inadlaw, ginhambal sang Philippine Institute of Volcanology and Seismology (Phivolcs) nga may yara sang tatlo ka pwede matabo – pag-guwa kag pag-ilig sang lava halin sa baba sang bulkan, mas kusog nga paglupok, ukon paghagan-hagan sang iya aktibidad.
Base sa ila assessment kag pagkumpara sa iban nga mga bulkan, posible suno kay OCD Western Visayas Director kag Regional Task Force Kanlaon Chairperson Raule Fernandez ang pag-guwa kag pag-ilig sang lava.
“Aton ginapreparahan ang pagpataas sang alert level, pero subong yara kita gihapon sa Alert Level 3 base sa rekomendasyon sang Phivolcs. Nagapadayon ang aton pagpanghanda sa Himamaylan City, kung sa diin aton tuyo tukuron ang isa ka “tent city” bilang preparasyon sa mas lala nga sitwasyon,” hambal ni Fernandez.
Sa Negros Oriental, ginatan-aw ang Vallehermoso kag Guihulngan City bilang mga lugar nga pwede tukuran sang “tent city.”
“Aton ginahulat ang masunod nga abiso sang Phivolcs, nga maid-id nga nagamonitor sang sitwasyon. Sa subong, gamay ang risgo sang lahar bangod ang abo kag iban pa nga materyales gikan sa bulkan ang malayo sa ginailigan sang tubig. Bisan indi “alarming” ang sitwasyon, kita nagabuhat na sang kinahanglan nga preparasyon,” hambal ni Fernandez.
Sang nagligad nga duha ka semana, regular nga nagatipon ang mga ahensya kag opisina nga katapo sang Regional Inter-Agency Coordinating Cell (RIACC) agud masiguro nga matatapan ang apektado nga mga pumuluyo.
Ginsiguro man ni Fernandez nga bastante sa gihapon ang relief goods para sa mga nag-bakwit nga pamilya, samtang yara man ang mga lokal nga panguluhan kag ang Philippine Red Cross sa paghatag sang bag-o luto nga mga pagkaon sa mga evacuation center.
Sa subong, masobra P36.19 milyones na ang balor sang bulig nga nabaton sang mga apektado nga pumuluyo gikan sa Department of Social Welfare and Development (DSWD), local government units (LGUs), kag non-government organizations (NGOs). (AGP/BPS/ PIA Negros Occidental/ Office of Civil Defense)
