SYUDAD SANG ILOILO (PIA) — Ang One Town, One Product (OTOP) Philippines nga programa sang Department of Trade and Industry (DTI) nagapabilin nga nagapanguna nga palaagyan sa pagpasanyog sang Micro, Small, and Medium Enterprises (MSMEs) sa Western Visayas.
Ginpakigbahin ni DTI 6 OIC Assistant Regional Director Mutya D. Eusores sa Kapihan sa Bagong Pilipinas (KBP) episode sang Marso 11 nga bangud sa mabaskog nga kolaborasyon sang mga lokal nga panguluhan, nasyonal nga mga ahensya, kag pribado nga sektor, ang ini nga programa nagapasangkad sang inobasyon sang mga produkto kag market access sa rehiyon.
Sang 2024, nabuligan paagi sa programa ang 711 ka MSMEs, nakadihon sang 545 prototypes, naka-angkon sang P321.83 milyon nga kita, 22 trade fairs ang nasuportahan, kag nakapatukod sang isa ka bag-o nga OTOP Hub.
Ang OTOP Hubs, nga masami makita sa mga paluparan, terminals, tourist spots, Negosyo Centers, kag iban pa nga pirme ginadugokan sang mga turista nga lokasyon kaangay sang malls, nagaserbe bilang pasalubong centers nga nagapakita sang nagkalain-lain nga lokal nga mga produkto.
Subongman, ang pag-endorso sang the Regional Development Council (RDC) sang Republic Act 11960 ukon OTOP Philippines Act nagpabakod man sang institutional backing para sa MSMEs sa Western Visayas, nga sa subong may yara na siyam ka OTOP hubs.
Ang pinakabag-o nga hub, nga ginlunsar sang Disyembre 26, 2024 sa Casa Real de Iloilo, naghatag pa guid sang mas dako nga oportunidad sa mga lokal nga MSMEs para itanyag ang ila mga produkto.
“The OTOP Philippines Act includes one of the key guidelines or provisions which is the establishment of OTOP Local Program Office of our LGUs. They are mandated by the law to establish it along with the local OTOP Hub,” suno kay Eusores.
Dugang pa sini, padayon ang DTI sa pagpahibalo sang sini nga layi sa mga lokal nga panguluhan kon sa diin ila ginalakip ang buy-in nga proseso kag ginapresentar sa ila indi lang agud mas maintindihan ang layi kundi pati man ang mga benepisyo nga dulot sang programa.
“The OTOP Law will also capacitate our LGUs not only in terms of regulatory of businesses but also in the development,” pahayag ni Eusores.
Ginsambit man sang DTI 6 nga ahensya padayon pa sa pagdihon sang National OTOP Strategic Development Plan nga tinutuyo nga pasantuon sa ila MSME Development Plan, nga amo gindesenyo bilang sabat sa mga kinahanglanon sang MSMEs sa karon. (AAL/AGP/PIA 6)
