TAGBILARAN CITY, Bohol, Jan. 12 (PIA) — Ikaw ba, anak sa single parent o bisag minyo nga karon Overseas Filipino Worker (OFW) o ‘gisagop sa OFW’ nga mo-entra sa first year college alang sa academic year 2023-2024?
Kon mao kana, mahimo ka nga mo-apply sa scholarships ilawom sa Congressional Migrant Workers Scholarship Program (CMWSP) ilawom sa Overseas Workers Welfare Administration (OWWA) sa Department of Labor and Employment (DOLE).
Segun pa sa OWWA Region 7, bukas na ang online applications alang sa nahisgutang scholarship sugod Enero 9 ngadto lamang sa Enero 31, 2023.
Alang sa mga interesado, gikinahanglan nga makakuha og scanned copy sa pruweba sa grado alang sa Grades 9 ngadto sa Grades 11 ug Form 137 o Form 138, o kon wala, pwede ang certification of grades gikan sa tunghaan, o sa mga buhatan sa Division o Regional Department of Education Offices.
Ikaduha ang dili hanap nga Birth Certificate alang sa anak sa kasado nga OFW, gikan sa Philippine Statistics Authority (PSA) o National Statistics Office (NSO) o sa Local Civil Registrar (LCR).
Sa mga anak sa wala maminyo nga OFW, gikinahanglan ang scanned copy sa Certificate of No Marriage (CENOMAR) nga gimatuod sa PSA, NSO o sa LCR.
Sa mga OFW nga walay anak apan interesado nga mopaambit sa kahigayunan nga makakuhag scholarship ang iyang kapamilya, gikinahanglan ang nilagdaan nga deklarasyon nga nagmatuod nga wala siyay anak nga nagsalig kaniya, ug nga iyang gitumbok ang laing sakop sa banay isip kwalipekado nga aplikante.
Ikatulo ang 2 x2 nga ID picture nga nakuha gikan sa labing dugay, tulo ka buwan sa wala pa mofile sa application, hulagway nga colored sa puti nga background, may name tag nga ibutang usa ka pulgada ubos sa suwang, suwatan sa tinuod nga ngalan, apilhido sa inahan, apilhido, extension sa ngalan, ug pirma sa aplikante.
Ikaupat nga rekisitos mao ang timailhan sa binuwan nga kita sa ginikanan o guardian sama sa Income Tax Return, Pay Slip, Overseas Employment certificate (OEC) ug uban pang pagmatuod.
Ikalima ang tin-aw nga kopya sa pasaporte sa OFW.
Kon anaa na kini nga scanned copy, mosulod na ngadto sa https://scholarship.owwa.gov.ph, aron ma file ang application.
Matud pa sa OWWA, adunay eksaminasyon alang sa mga aplikante sa umaabut nga Marso 11 ug 12.
Human nga mafile ang application, ang OWWA7 mopadala ra og pahibaw pinaagi sa text o email sa status sa aplikasyon ug sa ubang detalye alang sa eksaminasyon, pasabut sa OWWA7. (RAHC/PIA7 Bohol)
