ILIGAN CITY (PIA) — Adunay nay permanenteng opisina ang Iligan Investment Incentives and Promotions Center (IIIPC) nga nahimutang sa unang andana sa Mejia Building sa Barangay Pala-o.
Ang opisina magsilbing sentro sa dakbayan sa pag-promotar sa mga pamuhunan ug kalamboang ekonomiko.
Sumala ni IIIPC executive director Marie Grace Halibas, ang pag-abli sa opisina usa ka dakong lakang sa Iligan sa pagdani sa mga mamumuhunan sa syudad.
“Siyempre, mag-invite ta’g investors here, so we should have a practical and at least comfortable office. Maka-invite pud ta ug makawelcome sa atong guest,” sumala niya.
Ang opisina nga wala’y permanenteng lugar kaniadto, karon gi-rebrand ug opisyal nga ilhon nga Local Economic Development, Investment, and Promotions Office, sumala sa updated investment code sa Iligan.
Gisaysay sab ni Halibas nga ang pag-abli sa opisina nagpakita sa determinasyon sa Iligan nga maghimo og mas magaan ug komportableng palibot alang sa mga negosyo ug sa pagpalig-on sa suporta sa lokal ug regional nga kalamboang ekonomiko.
Pinaagi niining inisyatibo, nagtinguha ang Iligan nga madani ang daghang mamumuhunan, masuportahan ang mga lokal nga negosyo, ug makahatag og kontribusyon sa mas halapad nga innovation ecosystem sa Northern Mindanao.
Dugang pa, ang building nga nagsilbing bag-ong opisina napalit na sa lokal nga kagamhanan ug nag-accommodate usab sa Department of Trade and Industry – Shared Service Facility para sa Digital Creatives Innovation Hub nga naa sa ikaduhang andana, nga gipadagan sa Center for Digital Iligan Innovation and Sustainability. Kini nga inisyatibo kabahin sa mas lapad nga estratehiya sa Iligan sa pagpalambu sa innovation ug digital transformation.
Ang inaugurasyon sa bag-ong opisina usa sa mga highlight sa Northern Mindanao Regional Innovation Program and Exhibit 2025, usa ka kalihukan nga nagpasidungog ug nag-promote sa innovation, kolaborasyon, ug kalamboang ekonomiko sa tibuok rehiyon. (LELA/PIA-10/Lanao del Norte)
