SAN JOSE, Antique (PIA) — Nagbisita sa probinsya kang Antique ang mga opisyal kang probinsya kang Benguet kang kan-o gid lang para magpatigayon kang cultural benchmarking.
Ang dyang akitibidad tuyo nga makatipon kang kinaaram sa implementasyon kang mga programa nga Cultural Mapping kag School of Living Traditions (SLT) nga nagasiguro kang proteksyon kag pagpreserba kang kultura kang indigenous people sa probinsya.
Para masiguro ang mapinuslanon nga darwa ka adlaw nga pagbisita, nag-preparar kang nagkalain-lain nga aktibidad ang Sangguniang Panlalawigan (SP) kang Antique kag ang Provincial Tourism and Cultural Affairs Office (PTCAO).
Una nga ginpresentar sa delegasyon kang Benguet ang implementasyon kang SLT sa probinsya, nga nagatugro higayon sa mga kamal-aman nga ipaalinton sa mga masunod nga henerasyon andang kultura kag tradisyon.
Samtang, ginpakigbahin ni Dr. Felisa Beriong, anay Antique Schools Division Superintendent, ang pira sa mga importante nga aspeto kang madinarag-on nga cultural mapping kag resource profiling.
Ang cultural mapping kag resource profiling mga sistematiko nga pamaagi sa pagkilala kag pag-rekord kang cultural properties sa sangka komunidad.
Nakigbahin man sa sangka paghinun-anon ang mga opisyal kang Benguet kaimaw mga myembro kang Ati kag Iraynon Bukidnon Indigenous Peoples (IP).
Anda gin-isturyahan kung paano nakabulig ang gobyerno sa pagprotekta kag pagpreserba kang andang pinasahi nga kultura kag mga tradisyon, ilabi ron sa tunga kang makabag-o nga panahon.
Sa pagkilala kang mga kinamatarong kang IP groups, ginhambal ni Charlen P. Rosales halin sa National Commission on Indigenous Peoples (NCIP) nga importante ang pagbuol kang Free, Prior, and Informed Consent (FPIC) para sa tanan nga mga programa para sa mga IP.
Dugang ni Rosales, ang FPIC nagasuporta kag respeto sa kinaaram, kultura, kag tradisyonal nga pag-ginawi kang mga IP.
Sa bahin ni Benguet Provincial Board Member Benjamin Palbusa, ana ginpabutyag ang pagpasalamat kang andang delegasyon sa mga Antiqueño para sa mainit nga pag-abi-abi kag oportunidad nga makaagom kang kinaaram tuhoy sa pagprotekta kang kultura.
Suno kay Palbusa, tuyo nanda nga gamiton man ang mga istratehiya kang Antique sa pag-preserba kang andang kultura bilang mga Igorot. (AGP/BPS/PIA Antique)
