SYUDAD SANG ILOILO (PIA) — Ginlunsar sang Provincial Committee on Anti-Trafficking and Violence Against Women and Children (PCAT-VAWC) ang Orange Help Desk sang Nobyembre 25, 2024 sa Dumangas Port, Iloilo.
Ang kahiwatan isa sa mga mayor nga aktibidad sa pag-obserbar sang 18-Day Campaign to End Violence against Women sa probinsya sang Iloilo nga nagalawig humalin Nobyembre 25 tubtub Disyembre 10.
“VAW Bigyan ng Wakas, Ngayon na ang Oras,” ang tema sang karon nga tuig nga kampanya.
Tinutuyo sang kahiwatan nga mapabakod ang advocacy initiative sa pagtapos sang kalakasan batuk sa mga kabataan kag kababaenhan, manduan ang bilog nga komunidad nga suportahan ang movement kag ihinambit ang kaimportante sang kolektiba nga pagpanikasog sa paghimo sang aksyon batuk sa anuman nga porma sang harassment kag pagpang-abuso.
Gintawag nga Orange Help Desk bangud ang kolor nga orange nagarepresentar sang kampanya sa karon nga tuig kag nagasimbolo sang paglaum kag optimism samtang ang Help Desk isa ka pasilidad nga nagaserbe bilang frontline service provider sa mga kababaenhan kag kabataan nga nakaeksperyensya sang pisikal, mental, mabinatyagon, sekswal, economic kag iban pa nga sahi sang kalakasan kag pagpang-abuso. Diri ang mga abused sector ang mahimo makareport kag makahambal sa mga otoridad sang ila kinamatarong nga ginalapas kag gilayon nga makapangayo sang bulig.
Ginpasakupan ang launching ceremony sang mga opisyal sang Iloilo Provincial Social Welfare Development Office, mga miyembro sang PCAT-VAWC, katuwang nga ahensya, mga opisyal sang barangay VAWC, kag iban pa nga tagsakdag nga nagpakita sang ila suporta pinaagi sa paglagda sa Commitment Wall kag pagpakita sang STOP VAWC sign. (AAL/LAF/PIA6-Iloilo/Balita Halin sa Kapitolyo)
