SYUDAD SANG ILOILO (PIA) – Pormal nga ginbuksan sang Iloilo City government ang outdoor gym, kag iban pa nga mga pasilidad sa Plaza Libertad, City Proper district, kun sa diin ini ang mas makapasanyog pa sang kaayuhan sang mga katigulangan kag iban pa nga mga pumuluyo.
Ginpangunahan ni Iloilo City Mayor Jerry Treñas ang inagurasyon sang mga pasilidad kaupod si Department of the Interior and Local Government (DILG)-6 director Juan Jovian Ingeniero sang Abril 7, 2025.
Suno sa alkalde, ang pagbukas kag pag-imprubar sang Plaza Libertad isa man ka tikang sa paghimo sang makasaysayan nga plaza nga mas masinadyahon, inclusive, kag people-friendly para sa tagsa ka Ilonggo.
Dugang pa ni Treñas nga ang proyekto ang magapasanyog sang ikaayong lawas, magahatag sang ligwa kag kombinyente nga lugar para sa publiko nga gusto mag-relax.
Ang proyekto naglakip man sang pagbukas sang bag-o nga restroom, kag pagpanumbalik sang makasaysayan nga fountain sang plaza, nga natapos sa bulig sang Eskwela Talyer, isa ka grupo sang mga artista nga nagaespesyalisar sa pagpanumbalik sang palanublion.
Ang mga pag-uswag nga natigayon sa Plaza Libertad sa syudad sang Iloilo ang ginpondohan sa idalom sang Local Government Support Fund. (AAL/JNH/PIA Iloilo)
