SYUDAD SANG ILOILO (PIA) — Naglab-ot sa P1,125,494,431.00 ang pondo sang probinsya sang Guimaras nga ginlagdaan ni Gov. JC Rahman Nava para sa masunod nga tuig.
Nalakip man sa ginlagdaan ang badyet nga P292,145,000.00 para sa Local Economic Enterprise nga nagasakop sang galastuhon para sa Dr. Catalino Gallego Nava Provincial Hospital (DCGNPH).
Nahibaluan nga ang tuigan nga pondo sang gobyerno probinsyal kag DCGNPH ang gin-aprubahan sa ginhiwat nga 19th regular session sang 10th Sangguniang Panlalawigan sang Nobyembre 19, 2024.
Suno sa impormasyon sang gobyerno probinsyal, ang aprobado nga badyet mas mataas sa 18.34% ukon P174,433,225 kumpara sa 2024 nga pondo.
Ginpahayag ni Vice Gov. Atty. John Edward Gando nga ang timprano nga pag-apruba sang 2025 nga pondo ang magasiguro sang bag-o nga badyet sang probinsya sugod Enero 1, 2025.
Samtang, dako ang pagpasalamat ni Gov. Nava sa mga miyembro sang sanggunian sa nahiusa nga pag-ugyon sang badyet.
“Ginapasalamatan ko gid subong nga adlaw ang inyo pag-aprubar sang aton nga 2025 budget sa Provincial Government kag operational budget sang Dr. Catalino Gallego Nava Provincial Hospital,” suno kay Gov. Nava. (AAL/LMLE/PIA Iloilo)
