MISAMIS ORIENTAL (PIA) – Gipalit ug giplastar na sa lokal nga pangagamhanan sa Lugait, Misamis Oriental, ang closed-circuit television kon CCTV nga nagkantidad og P1.6 milyones alang sa pagbantay sa mga panghitabo sa nagkalain-laing lugar sa munisipyo.
Mibisita sa CCTV control room, sulod sa Municipal Disaster Risk Reduction and Management Council office, si Mayor Wellie Lim aron personal nga makita kung unsa ang kahimtang sa mga lugar nga gibutangan sa mga CCTV camera sa lungsod.
Usa ka gabii gikan na taod ang mga CCTV camera, gisusi dayon kini ni Lim, ug iyang nakita nga tungod niini, matabangan gyud ang pagsaksi sa mga panghitabo sa palibot sa lungsod.
“Tinguha sa atong administrasyon nga ma-atiman dayon ang mga kalamidad ug krimen alang sa kahusay ug kalinaw sa lungsod pinaagi sa pagbutang sa CCTV cameras,” matud ni Lim.
Nagpasalamat usab si Municipal Disaster Risk Reducation and Management Officer (MDRRMCO) Maybelle Gabe sa maong mga ekipo.
“Gikalipay namo ang suporta ni Mayor kay tungod niining CCTV, ma-monitor na namo ang palibot labi na sa mga baha-onon nga mga lugar diri sa lungsod ug sa uban pang bahin. Tungod sa pagpalit ug pag install niining mga CCTV camera, mahimong real time na ang among pag-responde,” dugang ni Gabe.
Gipangbutang ang mga CCTV camera sa pinili nga mga lugar sa lungsod nga giisip nga kritikal aron makatabang sa pag-monitor sa peace and order ug disaster nga kahimtang pinaagi sa pagtan-aw ug pag-record sa mga panghitabo sa palibot. (Lugait LGU/PIA Misamis Oriental)
