SYUDAD SANG ILOILO (PIA) — Bilang kabahin sang pagpauswag sang imprastraktura kag koneksyon sa probinsya sang Iloilo, ginpundohan sang gobyerno probinsyal ang pagsemento sang 1.1 kilometero nga Madarag-Iprog Junction National Road sa banwa sang San Enrique sa balor nga P16.7 milyon.
Ang nasambit nga dalan ang magakonekta sa banwa sang San Enrique kag syudad sang Passi. Ginalauman nga makabenepisyo ini sa 1,003 ka mga panimalay gikan sa Iprog kag Madarag kag sa mga barangay sang Agtabo, Dalicanan, kag Gemumua-Agahon sa syudad sang Passi.
Dako ang pagpasalamat ni San Enrique Mayor Rosario Mediatrix Fernandez sa gobyerno probinsyal tungod sa proyekto nga magahatag kahigayonan sa pagpa-uswag sang komersyo kag mas mahapos nga transportasyon sang produkto sa agrikultura pakadto sa merkado.
“This is a big milestone and support of the provincial government to the municipality,” suno kay Fernandez.
May yara man sang P38 ka milyon nga ginhatag nga pundo ang probinsya para sa ikaduha nga bahin sang proyekto nga nasakop sa pagkonkreto sang dugang nga 900 ka metro nga dalan nga magakonekta sa Iprog pakadto sa national highway.
Nalakip sa mga nagtambong sang inagurasyon sanday Fourth District Board Member Rolando Distura bilang representate ni Gov. Arthur Defensor, Jr., Mayor Fernandez, Provincial Engineer Romeo Andig, Uswag Partylist Jojo Ang, Pavia Mayor Luigi Gorriceta, kag Iloilo Police Provincial Office director Bayani Razalan. (AAL/LMLE/PIA/Capitol News)
