TAGBILARAN CITY, Bohol, Jan. 19 (PIA) — Dul-an sa P3 milyones ang nadugang sa bili sa illegal nga drugas nga nasakmit sa mga tinugyanan sa balaod sa 2022 kon itandi sa 2021.
Kini nahilakbit sa pagtaho sa mga tinugayanan sa Bohol Provincial Police Office pinaagi ni Colonel Lorenzo Batuan, hepe sa kapolisan sa Bohol didto sa labing bag-o nga tigum sa Provincial Peace and Order Council (PPOC).
Sa taho sa Kampo Dagohoy diin himoa ang consolidation sa tanan nga mga accomplishments sa mga tinugyanan sa kapolisan ug sa mga kaalyado niini nga law enforcement agents, gisaysay ni Police Lieutenant Colonel Joseph Berondo, kinsa maoy mitaho sa ngalan ni Col Batuan nga sa 2021, mikabat sa P23,128,392.00 ang kinatibuk-ang bili sa drugas nga nasakmit sa mga otoridad.
Sa 2022, nahipos sa kadlanan ang P26,014,624 isip bili sa illegal nga drugas nga nahipos sa mga kampanya sa kapolisan ug mga tinugyanan sa kampanya batok sa illegal nga drugas.
Sa milabay nga 2022, 3,825.68 ka gramos nga illegal nga drugas ang nahipos sa mga tinugyanan, mga 400 gramos ang kapin sa 3,403.09 ka gramos nga nakuha niadtong 2021.
Shabu pa gihapon ang labing gi-abuso nga illegal nga drugas sa Bohol, ug nagpabilin nga magsamok pa gihapon usab ang marijuana, subay sa taho ni Col Berondo.
Hinuon, sa 2022, .30 ra ka gramos nga marijuana ang nasakmit sa mga tinugyanan.
Kini, pudyot lamang kon itandi sa 2021 kanus-a may 603 ka gramos o subra sa usa ka kilo ang illegal nga sagbot nga nasakmit.
Mas daghan usab ang armas nga na-angin sa pagkasikop sa mga suspetsado sa illegal nga drugas sa 2021 sa 11 ka buok kon iparang sa 2022 nga may lima lamang ka arams nga mobuto. (RAHC/PIA7 Bohol)
