SYUDAD SANG ILOILO (PIA) — Lubos nga kalipay kag pagpasalamat ang ginpabutyag sang mga Ilonggos nga nakabakal sang barato kag kalidad nga bugas sa Kadiwa sang National Irrigation Administration nga ginpahamtang sa gymnasium NIA Region 6 sa barangay Tacas, Jaro sadtong Septyembre 13, 2024.
Kapin isa ka libo nga sako sang kalidad nga bugas ang ginpreparar sang rehiyonal nga talatapan sang NIA 6 nga mabakal sa P29 per kilo ukon P290.00 sa tagsa ka 10 ka kilo para sa mga natumod nga grupo nga ginabug-usan sang mga senior citizen, Person With Disability kag solo parent sa tion sang paglunsar sang Bagong Bayaning Magsasaka (BBM) Rice kadungan sa pagselebrar sang ika-67 nga kaadlawan ni Presidente Ferdinand Marcos, Jr. sa amo nga adlaw.
Matapos mabasahan sa isa ka post sa Facebook, gilayon nga nagkadto sa Kadiwa sa NIA si Joan May Villafor sang Brgy. Lanit sa distrito sang Jaro sa pagalaum nga maka-avail sang barato nga bugas bangud dako ang iya makinot kon ipaanggid nga magdalawat ini sya sa mga balaligyaan.
Indi regular ang trabaho ni Villaflor kag ang iya bana wala man sang trabaho sa karon gani ginkalipay gid sini nga nalakip siya sa mga naka-avail sa programa nga daku ang mabulig sini sa iya pamilya nga ginakulang man kag may mga estudyante pa.
“Dako gid nga bulig katama, kay yadi pa ni, pila pa ka kalan-an ang amon masave,” malipayon nga pahayag ni Villaflor.
Kasubong ni Villafor ginpasalamatan kag gindayaw man sang senior citizen nga si Geovani Sendico sang Brgy Tacas ining pribilihiyo nga gintan-ay sang gobyerno nga makabakal sang barato nga bugas kag makabulig gid sang daku ilabi na sa mga pigado.
“Kung magbakal ka sa mga store syempre mahal ang bugas, isa ini ka privilege nga ginahatag sang NIA nga makabakal sang barato nga bugas ilabi na ang mga pigado,” siling ni Sendico.
Ginpahayag ni NIA acting regional manager Engineer Jonel Borres nga ang pagbaligya sang P29 per kilo nga bugas kabahin sang programa ni Presidente Marcos nga makahatag sang barato nga presyo sang bugas, indi lamang sang mga ulutanon kag iban pa produkto sang mga lokal nga mangunguma nga ginabaligya sa Kadiwa. Tinutuyo man sini nga direkta nga mabaligya sang mangunguma ang ila produkto agud madula ang middlemen kag mapabilin ang presyo nga barato.
Nagikan ang mga bugas, dugang ni Borres, sa Rice Contract Farming program sang ahensya nga ginsugod implementar sining Hunyo.
Sa idalum sang programa, ang mga mangunguma makabaton sang suporta sa ahensya agud labi pa mapaayo ang produksyon. Ini nga suporta ang ginalakipan sang bulig pinansyal kag farm inputs.
Sa karon kapin 1,200 ka ektarya sa kaprobinsyahanan sang Iloilo, Capiz, Antique, Aklan kag Negros Occidental ang nasakop sa programa. (AAL/LAF/PIA Iloilo)
