TAGBILARAN CITY, Bohol (PIA) – Gipangunahan mismo ni Kongresista Vanessa Aumentado ang pagtugyan ug groundbreaking sa kinatibuk-an nga P312.5M nga mga proyektong pang imprastraktura sa lungsod sa Buenavista.
Kauban sa mga lokal nga opisyales sa lungsod pinangulohan ni Mayor Dave Duallo ug Vice Mayor Elsa Tirol, mga barangay officials, mga tinugyanan sa Department of Public Works and Highways (DPWH) ug Department of Education, gihimo ni Aumentado ang pag-official sa seremonyas sa groundbreaking sa duha ka mga proyekto sa kadalanan ug duha ka imprastraktura sa pagpugong sa paglunop, nga may kinatibuk-ang kantidad nga P307 milyones alang lamang sa Buenavista.
Mga proyekto nga gipundohan sa nasudnong kagamhanan ilawom sa General Appropriations Act (GAA) sa 2023 ug sa 2024, kini giopatuman sa DPWH District Engineer sa Segundo Distrito.
Lakip sa mga proyekto nga pang imprastraktura nga buksan mao ang pagpasemento sa karsada paingon sa Barangay Rufo Hill, ngadto sa Bantuan ug lapus na ngadto sa Barangay Bago nga magkantidad og P100M, ang pagpalu-ag sa nasudnon nga dalan sa Barangay Hunan paingon sa Cruz nga nagkantidad og P92M.
Ug sanglit ang Buenavista permi nga nahulga sa baha tungod sa mga suba nga adto banlas sa Barangay Hunan, napundohan usab ang Flood Control Project alang sa Barangay Hunan nagdto sa Asinan nga nagkantidad og P100M, samtang sa suba sa Dait, lain nga P15M nga proyekto pamugong sa baha ang napundohan usab.
Sa susamang adlaw, gitugyan na usab ngadto sa local nga mga tinugyanana ang a one-storey two-classroom building alang sa Bato Elementary School, nga nagkantidad og P5.5M.
Niini, nagpasalamat ang kongresista sa kanunay nga pagsupporta ug kanunay nga pakigtambayayong ni Gobernador Aris Aumentado, board member Jamie Aumentado-Villamor, ug board member Tommy Abapo aron makapadangat ang kaayohan para sa mga barangay ug lungsod.
Gipasalamatan usab sa kongresista ang kugihan nga mga municipal officials ug mga barangay officials, sa perming init nga suporta ug kasibut nga mangalagad sa Buenavista. (RAHC/PIA Bohol)
