TAGBILARAN CITY, Bohol (PIA)- – Gilusad ning bag-o lang sa Pag-IBIG Fund ang “Pag-IBIG 1 Plus 1 Raffle Promo.”
Inisyatiba nga nagtinguhang awhagon ang mas daghang overseas Filipino workers (OFWs), self-employed nga indibidwal, online sellers ug informal sector workers nga magparehistro isip miyembro ug makatigom kauban sa Pag-IBIG Fund, ang plus 1 mao ang pagkombinse sa usa ka OFW, online seller o informal sector worker nga ibalik ang ilang pagkasakop sa PAG-IBIG.
Sa 1 Plus 1 Raffle Promo, ang mga aktibong miyembro sa Pag-IBIG nga nakatigom sa ilang Pag-IBIG Regular Savings sulod sa katapusang tulo ka buwan tawgon isip “PagIBIGfluencers,” ug sila ang mang-agni og bisan usa ka OFW o informal sector worker aron mahimong miyembro o i-activate og balik ang ilang Pag-IBIG membership (the“Plus 1”).
Parehong makakuha ang PagIBIGfluencer ug ang Plus 1 og eligibility alang sa savings ug housing loan programs sa ahensya, diin ang matag mosalmot adunay kahigayonan nga makadaog og P50,000 hangtod P500,000 sa grand draw.
Modagan hangtod Nobyembre 30, 2025, ang promo maghatag og reward sa mga aktibong miyembro sa Pag-IBIG Fund nga malampuson nga nagparehistro gikan sa mga nahisgotang sektor nga maghatag og dalan sa mga programa ug serbisyo aron makapahimos ang mas daghang Pilipino.
Gipasugdan sa Pag-IBIG Fund ang programa aron mas makapahimos ang mga OFW, self-employed, ug mga wala kaayo naserbisyuhan nga mga kawani nga dili susama sa mga empleyado sa pribado ug gobyerno, walay mga employer nga magparehistro kanila.
Kini nga sektor pasagdan nga magpatala sa ilang kaugalingon sa mga social security institutions.
Gibutyag ni Pag-IBIG Fund Chief Executive Officer Marilene Acosta nga kapin sa 7,000 ang mga bag-o ug reactivating nga miyembro ang nisalmot na sa promo sa unang buwan niini, nga nagpataas sa membership ug savings collection sa ahensya.
Ang mga interesadong mosalmot sa Pag-IBIG 1 Plus 1 Raffle Promo mahimong mo-sign up sa https://www.pagibigfundservices.com/1plus1/. (ECB/PIA7-Bohol)
