MANTICAO, Misamis Oriental (PIA) – Mikabat sa halos 200 ka tawo ang na-serbisyohan sa Lingkod Pag-IBIG On Wheels (LPOW) caravan nga gipahigayon niadtong Biyernes, Abril 4. Ang mga benepisyaryo naglakip sa mga kasamtangang miyembro ug kadtong gusto pa magpa-miyembro.
Sumala ni Maria Teresa Joena T. Omahoy, Marketing Analyst sa Pag-IBIG Carmen Branch, naghatud sila og nagkalain-laing serbisyo sama sa loan application, pagparehistro isip miyembro, pag-update sa membership, pagpangutana bahin sa posibleng ma-loan, pag-apply og loyalty card, ug pagpahibalo kabahin sa mga benepisyo nga gitanyag sa Pag-IBIG Fund.
Gipadayag usab ni June Clyde D. Patilano, Business Permits and Licensing Officer (BPLO) sa Manticao LGU, nga dakong tabang ang LPOW caravan alang sa mga trabahante nga dili makalugar og adto sa buhatan sa Pag-IBIG sa Cagayan de Oro City tungod sa kakulang sa oras.
“Gawas nga dili na sila mo-biyahe paingon sa Cagayan de Oro o sa Iligan City, dili na usab sila makagasto pa og dako aron lang maka-update sa ilang membership o makakuha og loyalty card,” pamahayag ni Patilano.
Ang mga serbisyo nga dala sa LPOW mao ang pagparehistro isip miyembro sa Pag-IBIG Fund, pagtan-aw sa savings ug records, pagpasa sa aplikasyon alang sa Multi-Purpose Loan, Calamity Loan, o Provident Benefits Claim, ug paghatag og dugang impormasyon kabahin sa ubang benepisyo sa Pag-IBIG.
Si Mayor Stephen S. Tan nag-ingon nga dad-on sa iyang administrasyon ang mga serbisyo sa gobyerno paduol sa katawhan aron mabati ug makita gyud sa katawhan nga naglihok ang atong gobyerno. (Manticao LGU/PIA 10-Misamis Oriental)
