CEBU CITY, Cebu (PIA) – Ang Philippine Atmospheric Geophysical and Astronomical Services Administration (Pagasa) mipagawas og advisory kabahin sa nagsingabot nga ting-init nga panahon kini sigon sa paghinay sa Northeast Monsoon o Amihan nga gilauman nga magsugod sa tunga-tungang bahin sa buwan sa Marso.
Sa pagpahibalo nga gipagawas sa National Disaster Risk Reduction and Management Council o NDRRMC gisaysay niini nga ang Pagasa naglantaw na karon sa paghuman sa Northeast Monsoon kung diin sundan na kini sa magkataas nga heat index nga posibleng masinati sa kadaghanang bahin sa nasod sa mga mosunod nga adlaw o semana.
Ang state weather bureau midugang nga ang grabeng kainit sa panahon motumaw pagsugod sa buwan sa Abril ug kini molungtad hangtod sa paghuman sa buwan sa Mayo.
Subay niini, gimanduan sa NDRRMC ang tanang nilang member-agencies ug mga local DRRM councils nga magbinantayon sa ilang tagsa-tagsa nga area of responsibility ug magmonitor kanunay sa potensyal nga mga epekto sa taas nga heat index ilabi na sa aspeto sa kahimsug ug kaluwasan sa publiko ug sa tibuok komunidad.
Isip pagpangandam sa panahon sa ting-init, ang mga ahensya sa gobyerno ug mga lokal nga kagamhanan gipahinumdoman nga ilakip sa ilang mga lakang ang pagpangandam sa ilang mga response mobility assets alang sa pagpakatap unya sa mga medical supplies ug mga emergency personnel nga gamiton ug moabag sa higayon nga adunay mga health emergencies nga motumaw mahitungod sa grabeng kainit sa panahon nga masinati.
Samtang, mihatag usab og mga pahinumdon ang ahensya ngadto sa publiko aron nga makalikay sa mga sakit nga posibleng motumaw epekto sa taas nga heat index sama sa heat exhaustion ug heat stroke.
Pipila niini mao ang pag-limit sa paggawas sa matag panimalay ilabi na sa mga oras nga ting-init, pag-inom og daghang tubig, pagminus sa pag-inom og kape, soda, tea, ug soft drinks.
Ang publiko gipahimangnuan usab sa pagdala kanunay og payong, kalo, ug pagsul-ob og sleeved clothing aron maprotektahan ang kaugalingon batok sa grabeng kainit. Dugang pa nga kinahanglan usab nga planohon og tarong ang mga lakaw o aktibidad nga pagatambungan aron nga dili maabtan sa ting-init.
Padayun usab karon ang pagpakatap og mga impormasyon gikan sa mga nag-unang ahensya sa gobyerno sama sa Pagasa ug DOH kabahin sa uwahing kahimtang sa panahon ug mga health advisories nga kinahanglang pang mahibaw-an sa publiko. (RGC/PIA7 Cebu w/ reports from NDRRMC)
