SYUDAD SANG ILOILO — Madamo nga mga stakeholders kag sektor sang komonidad ang nalakip sa pagdihon sang 4th Philippine Human Rights Plan (PHRP4) ini tungod nga ang mga nanarisari nga panan-awan magabulig sa plano nga mangin inklusibo kag epektibo.
Suno kay USec. Severo Catura, Executive Director of the Presidential Human Rights Committee Secretariat (PHRCS), gindisenyo ang PHRP4 agud mahatagan solusyon ang mga isyu tuhoy sa kinamatarong sang mga indibidwal lakip man ang civil and political rights, economic, social, and cultural rights, kinamatarong sang mga sektor nga madali mabiktima kasubong sang mga kababainhan, kabataan, persons with disabilities, indigenous peoples, migrant workers, persons deprived of liberty, kag iban pa.
Si USec. Catura ang nagpanguna sa paghiwat sang PHRP4 regional consultation sa syudad sang Iloilo.
Ang PHRP4 magapabakod man sang mga istratehiya sang gobyerno angot sa mga programa kag proyekto nga magapasanyog sang estado kag kalidad sang pagpangabuhi, kag dignidad nga ginahanduraw sa idalom sa panawagan sang administrasyon sa Bagong Pilipinas.
“Pinapa-enrich natin ‘yung plano para makasama talaga ‘yung mga programa ng CSOs at NGOs dito sa planong ito. It’s not going to be just government deciding the plan but it’s actually everyone. It is inclusive, ” pahayag ni Catura.
Sa karon, ang draft plan ang gina-usisa sang mga human rights stakeholders nga nagarepresenta sang non-government organizations, civil society, kag lokal nga panguluhan sa nagkalain-lain nga rehiyon.
Ang konsultasyon sa bilog nga pungsod ang ginkoordinar sang PHCRS kaupod sang Department of Foreign Affairs-Office of the United Nations and International Organizations. Nalakip man diri ang UN Office of the High Commissioner for Human Rights, UN Office of the Resident Coordinator in the Philippines, kag Commission on Human Rights (CHR).
Madumduman nga naghiwat man sang PHRP4 regional consultation sa Angeles City para sa Northern kag Central Luzon, Mandaluyong City para sa National Capital Region, kag Tagaytay sa bahin sang Southern Luzon.
Pagahiwaton man ang consultations sa syudad sang Cebu, Davao, General Santos, kag Cotabato.
Suno kay Catura, ang mga input sa ini nga mga konsultasyon ang iga-integrate, finalize kag ipasa sa talatapan ni Presidente Ferdinand Marcos, Jr.
Tuyo nga i-lunsar ang PHRP4 sa Disyembre 10 kadungan sa kahiwatan sang International Human Rights Day. (AAL/LMLE/PIA)
