SYUDAD SANG ILOILO (PIA) – Nangin madinalag-on ang liwat nga paghiwat sang Iloilo River Dragon Boat Festival sa syudad sang Iloilo sang Nobyembre 22-24 kung sa diin masobra sa 500 ka paddlers ang nakipagbahin.
Onse ka hubon nga naghalin sa Iloilo, Aklan (Boracay), Cebu, Bohol, kag Manila ang nagpasakop sa kompetisyon nga nagatilaw sang ila kusog, kadasigon, kag teamwork bangud ang palumba ang nagpakita sang apat ka mga kategorya nga amo ang Premier Open, Premier Mixed, Premier Women, kag Senior Mixed A.
Nagpakita sang ila kakusog, koordinasyon, kag manami nga estratehiya ang Bomba Pilipinas rason para sila ang mangin kampeon sa Senior Mixed category; nanguna naman ang Iloilo Paddlers Club Inc. sa Women’s Small Boat category; samtang nagpanguna ang Boracay All Stars sa Mixed Standard Boat kag Open Standard Boat nga mga kategorya.
Ang iban pa nga nagdaugg sa tagsa ka race category amo ang Iloilo Paddlers Club (1st runner up), Bruins Racers of High Seas (2nd runner up), kag PADS Adaptive Dragon Boat Racing Team (3rd runner up) para sa Senior Mixed category; PADS Adaptive Dragon Boat Racing Team (1st runner up), Boracay Dragon Force (2nd runner up), kag Bomba Pilipinas (3rd runner up) para sa Women Small Boat; Bomba Pilipinas (1st runner up), PADS (2nd runner up), kag AmPPhi x Manila Klasiko Dragon Boat Team (3rd runner up) para sa Mixed Standard Boat category; kag PADS (1st runner up), Boracay Dragon Force (2nd runner up), kag Cebu Pink Paddlers (3rd runner up para sa Open Standard Boat category.
Samtang, ginpahayag ni Iloilo City acting mayor Jeffrey Ganzon nga ang kahiwatan nagatuyo sa pagpasanyog sang sportsmanship sa mga indibidwal kag pagkilala sa cultural heritage sang suba samtang ginasulong ang sustainable development.
Suno naman kay Iloilo Festivals Foundation Inc. President Allan Ryan Tan, ang Iloilo Dragon Boat Festival nagapakita sang pag-ugyon sang mga pumuluyo kag paghatag sang importansya sa eco-tourism.
Ang madinalag-on nga pagbalik sang Iloilo River Dragon Boat Festival ang gin-organisar sang IFFI kag sang Iloilo City government, kaupod ang Double Dragon Corp. (AAL/JNH/PIA Iloilo)
