SYUDAD SANG ILOILO (PIA) — Gindayaw sang Commission on Population and Development (CPD) sa Western Visayas ang pagkilala sa Iloilo City government bilang isa sa mga “Global Self-Reliant City in Family Planning and Adolescent Sexual and Reproductive Health.”
Ining pasidungog nga ginhatag sang The Challenge Initiative (TCI) sang Zuellig Family Foundation ang nagapakita sang maayo nga pagpamuno kag pangako sang syudad sa paghatag sang madali matigayon kag matinumanon nga mga serbisyo para sa pagplano sang pamilya kag ikaayong lawas sang mga pamatan-on.
Angut sini, nagpasalamat si CPD 6 Regional Director Harold Alfred P. Marshall sa TCI sang Zuellig Family Foundation nga mangin kabahin sila sang ining importante nga hitabo.
Nangin kaupod ang CPD kag ang city government sang Iloilo, ilabi na sang City Population Office, sa pagpatuman kag pagkoordinar sang mga estratehiya nga may angut sa populasyon kag pag-uswag sa syudad, partikular sa responsible parenthood kag family planning kag sa pagpasanyog sang adolescent health and development.
Dugang pa ni Marshall nga padayon man sila sa paghatag sang technical assistance kag mga aktibidades sa capacity development sa mga ila mga partners kag stakeholders sa City government.
Sa pihak nga bahin, ginpakigbahin sang Iloilo City government sa isa ka press release ang daku nga pag-uswag sang lokal nga pagpatuman sang family planning (FP) kag adolescent and youth sexual and reproductive health (AYSRH) nga mga inisyatibo sa syudad sugod sang nag-upod sila sa TCI sang Mayo 2023.
Dugang pa, ang ila nga panikasog nagresulta sa talalupangdon nga mga kadalag-an, lakip ang paghanas sa kapin 601 ka mga community health worker, 252 ka mga postpartum family planning provider, 831 mobile outreach service provider, kag 290 ka mga adolescent-friendly health service provider.
Paagi sang sini nga mga panikasog kag mga kolaborasyon upod sa mga stakeholders, 100 porsyento sang mga kwalipikado nga mga pasilidad sa syudad ang nagatanyag karon sang postpartum, family planning kag mga adolescent-friendly health service, nakapatigayon ang syudad sang 95 ka mga hilikuton sa mobile outreach kag 480 ka mga kampanya sa demand generation, nga nagadala sang mga kinahanglanon nga serbisyo kag ihibalo direkta sa mga komunidad.
Suno sa CPD 6, sa kapin tatlo ka tuig humalin sang nagsulod ang syudad sang Iloilo City sa TCI, nakit-an ang pag-improbar kag pagsustinir sang ila mga programa kapin pa sa tatlo ka mga talaksan kaangay sang pag-improbar sang ila total fertility rate, pagpanubo sang mga pamilya nga wala sang access sa mga family planning commodities, kag ang pagnubo sang adolescent pregnancy.
Bangud sang ini nga katuman, ginpasalamatan sang city government pamunoan sang CPD VI sa idiom ni Marshall lakip ang liderato ni Mayor Jerry P. Treñas kag iban pa nga mga opisyal upod sanday City Health Officer Dr. Annabelle Tang, City Population Officer Ma. Cecilla Guillergan, TCI Focal Person PPO III Ma. Annie Masigon, kag anay DOH 6 Regional Director medical doctor Adriano Suba-an.
Nasaksihan sang CPD 6 sugod sang una nga nag-engage ang TCI sa syudad sang Iloilo kag pamatuod sa pagkilala nga ila nabaton ang nakita sini ang pag-uswag sang nagkalain-lain nga mga inisyatibo sang syudad sugod sadto. (FRG/PIA6/lakipan sang mga report gikan sa CPD6 kag Iloilo City PIO)
