TAGBILARAN CITY, Bohol, Feb. 7 (PIA) — Irekomendar sa Sangguniang Panlalawigan (SP) Committee on Public Works ngadto kang Gobernador Erico Aristotle Aumentado nga ipakontrata na lang ang pagtrabaho sa maintenance sa mga karsada sa Bohol, ilabi na kadtong gihimong agianan sa mga turista paingon sa mga suroyanan.
Kini sanglit nasayran sa Komitiba nga gipangunahan ni Board Member Nathaniel Binlod nga dagway og wala na mamaayo og mintinar ang mga kalimpyo sa mga kadalanan.
Nasayran usab didto sa tigum sa komitiba nga bisan sa mga gisuholan nga job-order nga mga trabahante alang sa pagmintinar sa karsada, wala maatiman ang kalimpyo, tungod na usab sa sunod sunod nga pag-uwan-uwan ug pagbanlas sa mga tubig nga nagdala og anud nga mga sagbot.
Matud pa sa Provincial Engineers Office, adunay kinatibuk-an nga 835 ka kilometros nga gimintinar nga provincial roads ang Bohol.
Niini, adunay naka assign nga usa ka job order nga kaminero nga magmintinar sa matag 3 ka kilometro, sa kasamtangan nga 283 ka mga kaminero nga sweldado sa Bohol.
Kinatibuk-ang P20,725,475 ka pesos ang budget sa Bohol alang sa mga kaminero ug laing P 25,630,000 alang sa materyales alang sa pagmintinar sa kadalanan.
Apan nahibaw-an usab nga sa matag mag-uwan, mobalhin ang focus sa trabaho sa mga kaminero ngadto sa mga imburanl aron pagseguro nga malahos lahos didto ang tubig ug walay nakabara aron walay lunop nga mahitabo.
May mga kaminero usab nga possible nga dili makatrabaho sa uwan.
Sala niini, nakit-an nga mahimong dili mabiyaan ang trabaho sa pagpanglimpyo sa kadalanan kon ipaagi kini og kontrata nga matumbok pinaagi sa bukas nga public bidding.
Kini tungod kay sa kontrata o sistema nga gitawag og takay, dili na magtagad ang trabahante sa oras ting-opisina nga maoy tamdan sa trabaho, uwan man o init, basta mapatuman ang kontrata, trabahoon gyud.
Human sa makuti nga pagtuki sa Komitiba, ila nga girekomendar nagdto sa SP nga maghimog resolusyon paghangyo sa gobernador nga pulihan ang job-order system sa sistema nga kinontrata aron dili gyud mabiyaan ang pagmintinar sa mga kadalanan dinhi. (RAHC/PIA7 Bohol)
