CEBU CITY, Cebu (PIA) – Gihangop sa Central Visayas ang bag-ong gipirmahan ni Presidente Ferdinand R. Marcos, Jr. nga balaod nga nagpa-hunong sa balaod nga ‘Mother Tongue-Based Multilingual Education’ (MTB-MLB).
Atol sa ika-21 nga Kapihan sa Bagong Pilipinas kauban ang Department of Education (DepEd) Region 7, si DepEd 7 regional director Dr. Salustiano Jimenez misulti nga kauswagan ang maong balaod alang sa mga magtutudlo ug mga tinun-an.
Mahitungod sa MTB-MLB, gihimong tamdanan sa mga magtutudlo ang Lubas sa Daga-ang Binisaya (LUDABI) nga diksyonaryo nga matud pa ni Jimenez mas lisod.
Gipaambit ni Jimenez ang usa ka pananglitan bahin sa Ingles nga pinulongan nga Sunday nga sa kada-adlaw nga gigamit, Domingo kini.
Apan, sa LUDABI, “Ligid-ligid” ang maong binisaya nga pulong nga Domingo.
“So kung adto sa libro ‘Ligid-ligid’ na, ang mga bata nga Sunday or Dominggo kasabot sila kay mao na ilahang mother tongue pero ang ato gud kay mo-follow sa dictionary (LUDABI),” ingon ni Jimenez.
Mahitungod sa bag-ong balaod, mapagaan ang mga palas-anon sa mga magtutudlo sa pagpasabot sa mga tinun-an ug mominus ang kalibog sa pagtudlo.
Matud pa ni Jimenez nga dili sayon ang pag-implementar MTB-MLB samtang adunay 11 nga nagkalain-laing klase sa Sinugbuanong bisaya.
“Kung Cebuano nga moadto sa Negros, aduna’y kalahian. Aduna pa usab mga lahi nga mga pasabot sa mga termino diri ngadto Negros Oriental o Bohol,” pasabot ni Jimenez.
Mahitungod niini, wala makahimo ang departamento og ‘Sinugbuanong Bisaya’ nga libro nga mamahimong tamdanan sa mga magtutudlo ug tinun-an.
Dugang pa niya isip regional director sa rehiyon, sa wala pa ang bag-ong balaod, mirisgo usab siya sa pag-paggamit sa Ingles o Filipino sa pagtudlo alang sa nalangkob nga tinun-an gikan sa kinder ngadto sa Grade 3.
Base sa Republic Act 12027, nga bag-ohay lang gipirmahan sa presidente, miingon nga ibalik ang pag-gamit sa pinulongang Ingles ug Filipino isip ‘medium of instruction’ para sa mga tinun-an gikan sa kinder ngadto sa Grade 3.
Gitugotan usab niini ang opsyonal nga pagpatuman sa mga klase ang monolingual. (JJT/PIA 7)
