TAGBILARAN CITY, Bohol (PIA) — Gipasalig sa National Irrigation Administration (NIA) Rehiyon 7 nga padayon ang ilang pagpalapad sa irigasyon sa Rehiyon 7 aron modaku pa ang abot ug kita sa mga mag-uuma sa rehiyon.
Matud pa nga nikabat sa 26 porsyento ang pagsaka sa irrigation development area sa Tungatungang Kabisay-an sa niaging tuig 2024.
Sa programang “Usapang Agrikultura” sa DYMR Radyo Pilipinas Cebu, gibutyag ni Engr. Maria Donesa Autida, NIA-7 acting operations section chief, nga nisaka og 26 porsyento o katumbas sa 63 mil ka ektarya ang napatubigan sa ahensiya sa tuig 2024 gikan sa kapin sa 61mil ka ektarya sa tuig 2023 diin target sa NIA-7 nga mapatubigan ang 241 mil ka ektaryang umahan sa tibook Central Visayas.
Gidugang ni Autida nga sa tuig 2024, nikabat sa 590 ka irrigation system project ang natukod sa NIA-7.
Sa maong gidaghanon, adunay 577 ka mga Communal Irrigation System ug 13 ka National Irrigation System diin nahimutang ang 9 niini sa lalawigan sa Bohol, 1 sa Cebu ug 4 sa Negros Oriental.
Matud pa nga adunay 53 mil ka mga mag-uuma nga sakop sa 634 ka Irrigators Associations sa tibook rehiyon ang nakabenipisyo sa proyekto sa NIA ingon man ang kontribusyon gikan sa ubang ahensiya sa gobyerno sama sa Department of Agriculture (DA) ug sa Private Irrigators nga nagpadagan sa ilang kaugalingong irrigation system o gitawag og Private Irrigation System.
Sumala pa ni Autida, tinguha sa NIA nga mapalambo pa ang sektor sa agrikultura aron modaku ang abot ug kita sa mga mag-uuma sa rehiyon.
Karong tuig 2025, ilusad sa NIA ang mga proyekto ubos sa 2022-2030 Master Plan nga mopalambo sa agrikultura sa rehiyon sama sa pag-ayo sa mga nangaguba nga national ug communal irrigation system, pagpahiuli sa mga irrigation system nga wala na matagae sa tubig tungod sa problema sa kanal ug ang pagpalambo sa pipila ka mga national irrigation system sa rehiyon, ingon man ang padayon nilang paghatag og mga pagbansaybansay sa mga irrigators alang sa ilang operasyon ug pagmentenar sa tagsa-tagsa nila ka irrigation system. (ECB/PIA7-Bohol/NIA-7)
