SYUDAD SANG ILOILO (PIA) — Ginbisita ni Secretary Vivencio “Vince” Dizon sang Department of Transportation (DOTr) ang Iloilo International Airport kag Visayas Container Terminal sang Marso 8 agod nga usisaon ang nagapadayon nga mga pag-uswag sa pangtransportasyon nga imprastraktura sa rehiyon.
Kaupod sanday General Manager Jay Santiago sang Philippine Ports Authority (PPA) kag Director General LTGEN Raul Del Rosario AFP (Ret) kag Civil Aviation Authority of the Philippines (CAAP), ginlibot ni Dizon ang hulugpaan kag nagpakigpulong sa mga lokal nga opisyal kaangay nanday Governor Arthur Defensor Jr. sang Iloilo kag Mayor Jerry P. Treñas sang syudad sang Iloilo bahin sa mga proyekto diri.
Sa interbyu kay Dizon, iya ginpahayag nga kinahanglan nga makay-o sa gilayon ang airport lamang nga ginakabig ang syudad sang Iloilo ang isa sa pinakamadasig mag-uswag sa bug-os nga pungsod.
Ginpasalig man niya ang mga lokal nga opisyal nga padasigon ang proposal sang public-private-partnership (PPP) sang airport upod sa Prime Asset Ventures Inc. “agod masiguro ang tayuyon nga pag-improbar sang airport kag suportahan ang pag-uswag sang syudad.”
Suno kay Dizon, ginataw-an nga makumpleto ang proposal sang PPP sa sulod sang sin inga tuig. Apang, may nakatigana nga pondo gikan sa CAAP nga nagabalor sang P190-milyo nga ginapasalig niya para sa implementasyon sang kinahanglanon nga mga pagkay-o kag rehabilitasyo sang hulugpaan.
Ginpaboran man ni Gov. Defensor ang pagpribado sang operasyon sang airport bangod magakahulugan ini sang madasig nga implementasyon sang mga pag-improbar kag kinahanglanon nga pagkay-o sang mga pasilidad kag kagamitan sini.
Naghatag man sang suhestiyon ang lokal nga angay mangin isa ka “terminal mall” ang hulugpaan sa diin iya ginapanan-aw nga lubos nga magbag-o ang kinaiya sang isa ka terminal, nga nagapakita sang kultura sang mga Ilonggo kag ginadula ang stress sa pagbiyahe sang mga pasahero.
Bilang nagapanguna nga hulugpaan padulong sa Kabisayaan Nakatungdan, ginaserbisyohan sang Iloilo International Airport ang linibo ka mga pasahero adlaw-adlawa. Bilang isa sa pinakamasako nga airport sa guwa sang Metro Manila, ang pagpasangkad sini importante gid sa pagpauswag sang koneksyon sa kahawaan kag pagpasanyog sang turismo, negosyo, kag pamuhunan sa rehiyon.
Kasunod sang iya pagbisita sa airport, nagpadayon si Secretary Dizon sa Visayas Container Terminal, isa ka importante nga pasilidad para sa maritime trade sa rehiyon nga yara man sa idalom sang isa ka concession agreement upod sa International Container Terminal Services Inc. (ICTSI) kag PPA.
Suno kay Dizon, iya tuyo nga tan-awon ang terminal bangod sang iya mga nagabatian nga mga pagbag-o humalin sang nangin pribado ang pagdumala sa container port.
Dugang pa niya ng aini nagapakita sang mayo nga resulta sang pribatisasiyon kag tuyo sini nga nga ilugon ang kadalag-an sang proyekto sa iban nga mga pantalan sa pungsod.
Apang, ginaabi-abi ni General Manager Santiago sang PPA ang suhestiyon ni Gov. Defensor sa pagpatukod sang bag-o nga container port nga magasabat sa mga lokal nga kinahanglanon bangod ang VCT, sa nagakaigo nga tion, magasabat na lamang sa mga dumuluong ukon internasyonal nga mga kargamento.
Angot sini, sa mando ni Sec. Dizon, ginhatagan katungdanan ang PPA para sa pagpangita sang lugar nga mahimo sadsaran sang igabutang nga domestic cargo terminal.
Sa idalom sang PPA, lakip sa nga dalagko nga proyekto sa rehiyon ang pagtukod sang crane railway kag pagbutang sang quay crane sa Iloilo Commercial Port Complex, pagtukod sang cruise ship port sa Buruanga, Aklan kag ang Alegria Port Development Project nga yara man sa probinsya sang Aklan. (AAL/FRG/PIA6)
