SAN JOSE, Antique (PIA) — Naglab-ot ron sa 519,441 ukon masobra 95 porsyento ka mga Antiqueño ang nakarehistro sa Philippine Identification System o PhilSys para makabuol kang anda nga National ID.
Sa pihak ka dya, padayon sa gihapon ang mga taga-Philippine Statistics Authority (PSA) sa pag-adto sa mga marayo nga bahin kang probinsya para i-rehistro ang sin-o man nga gusto nga makabuol ka National ID nga pwede ma gamit sa anda mga transaksyon sa nagkalain-lain nga sangay sang gobyerno ukon pribado man nga sektor.
Ginhambal ni Provincial Statistics Officer kang PSA nga si Randy M. Tacogdoy, ang pag-angkon kang National ID isa ka hanggod nga bulig tungod masami nga nabudlayan ang kadam-an sa pagtransaksyon kag makaagum ka serbisyo sa nagkalain-lain nga opisina tungod pirme ginapangitaan kang darwa uko masobra pa nga opisyal nga ID. Masami, sanda ang yadtong nagapuyo sa marayo nga mga lugar, mga pigado, mga miyembro sang indigenous groups, mga mal-am, kag mga Persons with Disability (PWD).
Ang pag-agum kang National ID isa ka tulay para mas mapadali ang pag-angkon kang mga serbisyo sang gobyerno kag mga pribado nga negosyo ukon talatapan.
Dya nasandig sa Republic Act No. 11055, nga mas magapadasig sa pagsaylo sa “digital economy” nga pwede na magtransaksyon nga indi ron kinahanglan ang mga papel, presensya, ukon pisikal nga kwarta.
Ginadumilian man kang layi ang indi pagbaton kang National ID bilang opisyal kag naga isahanon nga pamaagi nga mapamatud-an ang identity sang isa ka indibidwal.
Ang indi pagbaton kang National ID mahimo nga ma preso nga indi magnubo sa anum ka bulan asta duha ka tuig, multa nga indi magnubo sa P50,000 hasta P500,000, ukon mahimo man nga ma preso kag mamultahan, depende sa desisyon kang husgado.
Kapareho man nga mga penalidad ang ang maangkun kang sin-o man nga indi awtorisado nga naga-imprenta, nagahimo, nagapangguba, kag nagapameke kang National ID. (AGP/PSM/PIA Antique with reports from PSA)
