UBAY, Bohol (PIA) — Inay solohon sa mayor ang pasidungog sa Anti Red Tape Authority (ARTA) sa komendasyon niini sa pag-usab sa mga proseso sa Ubay, gi-apil ni Mayor Constantino Reyes sa kalampusang ang paghago ug pagkugi sa mga kawani sa Buhatan sa Mamahandi, sa Information Communication Technology ug sa mga kapitanes.
Ang nasampit nga kalampusan tungod sa pagsagop sa functional electronic Business One Stop Shop, (e-BOSS) alang sa Ubay, segun ni ARTA director general Ernesto Perez.
Matud sa mayor, ang paghago ug porsigido nga pagpatuman sa kabag-ohan sa e-BOSS, maoy nagpa-agni sa mga mamumuhunan nga adto magtukod og negosyo ug pamuhunan sa lungsod.
Sa eBOSS, mahimo na nga dili pisikal nga motanda ang mga mamumuhunan sa munisipyo kay pwede na kini himoon sa online, ug mas sayon na ang proseso aron mapaspas ang pagpakuha sa permits ug lisensya alang sa legal nga pagnegosyo.
Kining tanan, dala sa walay puas nga paningkamot ug pagkugi sa mga tawo sa Buhatan sa Mamahandi sa Lungsod ubos ni Elizabeth Pabellan , sa Information Technology Programmer nga si Mark Nacua lakip na ang mga kapitanes sa 44 ka barangay nga mituman sa nahukmang sagopon nga pamaagi, matud ni Reyes atul sa pagtunol sa ARTA team sa komendasyon tungod sa pagsagop sa lungsod sa gipatulin nga proseso sa pag negosyo.
Gitugyan sa ARTA Team ngadto sa Ubay ang dungog isip labing una nga lungsod sa Bohol nga nakaangkon sa beyond compliance sa mga probisyones sa ARTA, tungod sa pagsagop niini sa mga digital nga proseso alang sa mas paspas nga pagkuha sa mga permits ug lisensya sa mga buot magsugod og negosyo sa lungsod.
Gikompirmar usab sa Department of Interior and Local Government (DILG) nga kompleto ang 44 ka barangay sa lungsod ang misagop sa online nga BOSS, pinaagi ni Gina Bastes ang cluster head sa DILG.
Kahinumduman nga ang lungsod sa Ubay, nangandoy nga mamahimong ika duha nga syudad sa Bohol, gawas sa Tagbilaran.
Apan, segun sa mga tinugyanan, subay sa batakan sa pagpahimong syudad sa us aka lugar, pasado na ang Ubay sa rekisitos sa populasyon, sa kadak-on sa iyang lugar.
Apan, nagkuwang pa ang lungsod sa saktong income nga makapasapal sa mga galastohan unya sa lungsod sa pagkahimo niining syudad sa pikas nga bahin sa Bohol.
Gawas sa mga bag-ong economic enterprise nga gipasugdan sa lungsod aron may kita sila, gilauman usab sa mga tinugyanan nga ang pagsagop sa paspas ug dayag nga mga porseso subay sa ARTA ug ease of Doing Business, kini maoy magtampo aron mas daghan ang manulod nga negosyante.
Niini usab, ilang gilauman nga makab-ut na unya nila ang damgo sa lungsod nga sa katapusan, mamahimo an sila nga syudad. (PIA Bohol)
