SYUDAD SANG ILOILO (PIA) – Ginakabig ni Philippine Information Agency (PIA) Director General Katherine Chloe S. De Castro nga dako ang mabulig sang pagtapna sang disinformation sa pagdepensa sang West Philippine Sea, gani iya ginhingyo ang mga Pilipino, ilabi na ang mga Kabataan nga aktibo nga pakigbatuan ang mga peke nga impormasyon nga nagalapta angut sa isyu sang WPS.
“The voice of truth should always be louder than lies. Ang laban kontra fake news ay laban nating lahat. Kayo ang magiging susunod na leader at tagapagtanggol ng ating bayan. Huwag nating hayaan na kasinungalingan ang manaig. Maging matalino. Maging matapang. Maging mapanuri at ipaglaban natin ang katotohanan,” siling ni De Castro.
Ginhatagan man niya sing importansya ang husto nga impormasyon sa pagpasanyog sang pungsodnon nga paghiusa nga kinahanglanon sa pagsakdag sang mga kinamatarong kag interes sang pungsod sa rehiyon.
Ini ang ginpahayag De Castro sa ginhiwat nga West Philippine Sea (WPS) Symposium nga gin-organisar sang Philippine Coast Guard (PCG), kaupod ang National Youth Commission (NYC) kag PIA sang Abril 4, sa John B. Lacson Foundation Maritime University sa Iloilo City.
Ang programa ginpangunahan ni Commodore Jay Tarriela, PCG Spokesperson para sa West Philippine Sea, kaupod si NYC Commissioner-at-Large Asec. Karl Legazpi, PIA Director General Katherine Chloe S. De Castro, kag PIA Western Visayas Regional Head Cheryl B. Amor, kun sa diin ini ang gintambungan man sang kapin 500 ka mga estudyante halin sa JBLFMU Arevalo kag Molo campuses.
Sa pihak nga bahin, ginkilala naman ni Commodore Tarriela sa iya mensahe ang importansya sang soberanong kinamatarong sang Pilipinas kag naghatag sang panan-awan sa mga pagpanghangkat sa seguridad sa kadagatan nga gina-atubang subong sang West Philippine Sea.
Ginpahayag pa sini nga kinahanglanon sang pungsod and mga mabakod, may ihibalo, kag nagapakigbahin nga mga pamatan-on sa pagsuporta sa panindugan sang Pilipinas sa pag-amlig sang iya soberano nga mga kinamatarong.
Ginhatagan man pagtamod ni Asec. Legazpi ang importante nga papel sang mga pamatan-on sa pag-amlig sang interes sang pungsod kag mangin malig-on nga mga manugsakdag para sa pagpreserbar kag pag-amlig sang WPS. Ginhingyo sini ang mga estudyante nga aktibo nga magpartisipar sa mga aktibidad nga nagaprotekta sa soberanya sang pungsod.
Samtang, bilang kabahin sang programa, naghatag man si Liez’l Marie L. Ejeda, Information Officer II sang Philippine Information Agency (PIA) – Iloilo, sang isa ka lecture angut sa Media kag Information Literacy, kun sa diin naghatag ini sang mga stratehiya kun paano kritikal nga ma-ebalwar kag makilala ang mga peke nga impormasyon.
Ginpahayag naman sang pila ka mga estudyante nga ang symposium naghatag sa ila sang ihibalo kag panan-awan sa sitwasyon sa West Philippine Sea, lakip na ang mga kinamatarong sang Pilipinas sa sulod sang iya Exclusive Economic Zone (EEZ), kinamatarong sa pagpangisda kag mga palaligban sa industriya sa kadagatan.
“I hope that my fellow students would understand the Philippines’ stand on its rights on the West Philippine Sea. We would be able to utilize it when we are graduates and working with our profession, for us to know our rights as Filipino seafarers later on,” siling ni Hans Ibert R. David, estudyante gikan sa JBLFMU. (AAL/JNH/PIA Iloilo)
