SYUDAD SANG ILOILO (PIA) — Ginkilala ni Presidente Ferdinand R. Marcos Jr. ang Palarong Pambansa nga nagapanguna sa mga national sporting event sa pungsod.
Sa iya pagpamulong-pulong sa pangbukas nga seremonya para sa nasambit nga sporting event sang Hulyo 9, sa Cebu City Sports Center, ginpahayag sang Presidente nga ang Palarong Pambansa amo ang mayor nga platform sa diin ginahulma ang mga palaabuton nga record holders kag mga Olympic champion.
“Today, we continue this important legacy, celebrating not just the games but also celebrating the unity, the camaraderie, and the national pride that these games inspire,” pahayag ni Presidente Marcos.
Ginhinambit man sang Punong Ehekutibo nga ang kahiwatan ang masobra pa sa inter-school kag inter-regional competition.
“It is also a platform where we discover, where we develop, and hone future professional athletes, Olympians, and servant-leaders,” pahayag sini.
Gindugang sang Presidente nga sa 541 ka mga atleta nga nagapasakop sa sini nga tuig nga Palarong Pambansa, nagapati ini nga madamo ang mangin record holders kag champions sa ila natungdan nga patag, indi lamang sa nasyunal nga level apang sigurado ini tubtub sa internasyunal.
Sa iya man mensahe ginsiling sang Presidente ang karon nga tuig nga edisyon sang Palarong Pambansa ang partikular nga espesyal bangud madamo nga una ang madugang kasubong sang una nga partisipasyon sang mga atleta nagikan sa National Academy of Sports kag Philippine Overseas Schools.
Suno sa Pangulo ang dance sports ang mangin regular feature sang hampang, isa ka fitting tribute sa Cebu nga isa sa pinaka-aktibo nga syudad sa dance sport competition.
Samtang ang Soft Tennis, Karatedo, Football para sa Secondary Girls kag E-sports magadebut bilang exhibition sports sini nga tuig.
Subong man ginhinambit sang Presidente nga sa karon nga tuig nga Palarong Pambansa makita ang integration sang teknolohiya sa web platforms, social media, game statistics kag live streaming.
“It will not only connect [these] games to families and fans around the world but also provide valuable data that we can use to improve [our] performance in future competitions,” siling niya.
“This occasion holds enormous significance beyond just sports,” pahayag ni Marcos.
Gindugang man sang Presidente nga ang values kag virtues nga igapakita kag igapractice sa tion sa sporting event kasubong sang excellence, teamwork, disiplina, perseverance kag sportsmanship ang kasubong nga mga huluaran nga kinahanglanon agud mangin madinalag-on sa kabuhi kag sa pagtukod sang halangdon nga nasyon.
Ginapakita sang Palarong Pambansa ang multi-level scholastic competition nga ginapasakupan sang mga atleta humalin sa elementarya kag sekondarya humalin sa 17 ka rehiyon sa pungsod, kag sang National Academy of Sports kag Philippine Schools Overseas.
Gintalana ini humalin Hulyo 6 tubtub Hulyo 17. (AAL/LAF/PIA6-Iloilo/PND)
