BAGUIO CITY (PIA) — Tuloy-tuloy ti panangikampanya ti National Nutrition Council-Cordillera (NNC-CAR) iti panangpondo dagiti local government units (LGUs) iti feeding program para kadagiti masikog ken maladaga a 6-23 months old.
Sigun kenni NNC-CAR Regional Nutrition Program Coordinator Bella Basalong, napateg a matutukan daytoy a grupo tapnu maliklikan ti stunting kadagiti ubbing ken para iti brain development dagitoy.
“Based on research studies, if we provide services beyond 2 years old, ‘yung impact niya like sa height ay very minimal. So, kung gusto nating i-address ang stunting, dapat ito ‘yung tutukan natin na groups, it is the pregnant women and zero to 2 years old,” ni Basalong.
Kinunana a siguden a mangipatpatungpal iti feeding program ti dadduma nga LGUs ngem ti benepisyaryo da ket dagiti ubbing nga agtawen iti duwa agingga lima.
Sigun kenni Basalong, napateg nga ag-shift dagitoy ken tutukan da dagiti agtawen iti duwa agpababa.
Sipud 2020, impatungpal ti NNC ti Tutok Kainan Supplementation Program. Puntirya ti programa nga ipaayan iti supplemental food dagiti masikog iti uneg ti 90 nga aldaw ken complementary food met dagiti ubbing a 6-23 months old iti uneg ti 180 days.
Iti 2021 agingga 2022, insayangkat ti NNC-CAR ti programa iti probinsiya ti Apayao.
Kinuna ni Basalong a naballigi ti implementasyon ti programa nu sadino 34 nga ubbing wenno 43.79% kadagiti benepisyaryo ti naaddaan iti improvement iti height maibasar iti sakbay ken kalpasan ti pannakaipatungpal ti Tutok Kainan program.
Iti met timbang, 85% wenno 60 nga ubbing ti naaddaan iti normal a timbang kalpasan ti programa.
Ita a tawen, maipatpatungpal ti programa iti sumagmamano a munisipyo ti Abra, partikular dagiti nakailista iti nangato a kaso ti stunting.
Dinakamat na met nga inraman da ti programa iti Devolution Transition Plan ti Department of Health ken NNC nu sadino, ikamkampanya da ti panangadaptar dagiti LGUs iti daytoy.
Adda metten ti LGU a nangikari a pagtalinaeden da ti feeding program kas iti ili ti Flora sadiay Apayao a nangilatang iti pondo para iti nasao a programa. (DEG-PIA CAR)
