Gipangunahan ni Pangulong Ferdinand R. Marcos Jr. ang pagsaulog sa National Day of Remembrance tong adlaw’ng Myerkules sa Camp Bagong Diwa, Taguig City kung asa gipasindunggan ang 44 ka mga kanhing opisyal sa Special Action Force (SAF) nga namatay sa pakiggira sa Maguindanao walo ka tuig na ang nilabay.
Sumala pa sa Pangulo angayang hatagan ug pagtahod ang mga naasoy’ng myembro sa SAF tungod sa gitawag “ultimate sacrifice” nga gibuhat sa mga hingtungdan samtang nagpahigayon ug operasyon batok sa gikatahong Malaysian terrorist ug bomb expert nga si Zulkifli Abdhir, alyas Marwan.
“We honor the 44 brave Special Action Force officers who made the ultimate sacrifice in the line of duty,” segun sa pangulo.
Ang kabayanihon sa SAF 44, matud pa sa mensahe niini, ang magpadayong magdasig sa nasudnon nga panggamhanan sa pag-alagad ug pagpanalipod sa katawhang pilipinhon.
Samtang, misaad si PNP Chief Gen. Rodolfo Azurin Jr. nga magpadayon sila sa paghatag ug pagpasidungog sa legasiya sa SAF 44 pinaagi sa aksyon ug dedikasyon sa mga kapulisan sa ilahang pagpanerbisyo.
Gisiguro niini nga mahinumdoman ang SAF 44 isip “true heroes” ug makulit ang pagsakripisyo sa kinabuhi sa mga mitaliwan sa libro sa kasaysayan sa nasud. (PGFruylan/PIA-Gensan)
