SYUDAD SANG ILOILO (PIA) – Ginpasundayag sang nagkalainlain nga micro, small, and medium enterprises (MSMEs) sa Western Visayas ang ila mga produkto sa primero nga rehiyonal nga trade fair nga “Panubli-on 2024: The Power of Local Creativity” sang Department of Trade and Industry (DTI) 6.
May kabilugan nga 185 ka mga exhibitors nagikan sa mga kaprobinsyahanan sang Western Visayas ang nagpasakop sa aktibidad nga ginbug-osan sang 24 ka MSMEs halin sa Aklan, 15 sa Antique, 13 sa Capiz, 28 ka exhibitors halin sa Guimaras, 36 sa Iloilo, 34 sa Negros Occidental, kag 35 halin sa mga DTI-assisted nga mga asosasyon.
Lakip sa mga makita nga produkto ang food kag non-food items kaangay sang fashion accessories, mga regalo, furnishings, decorative crafts, food products, kag footwear.
Sa iya mensahe, sa pagbukas sang aktibidad sang Nobyembre 13 sa SM City Iloilo, ginpunto ni DTI 6 Regional Director Rachel N. Nufable nga ang Panubli-on nagapadayon nga nagapakita sang kapagsik, subongman sang “entrepreneurial journey” sang MSMEs.
“Since its establishment in 2003, Panubli-on represents the gold standard of quality, that is why our different provincial offices are very selective in bringing here the MSMEs who will showcase their products. This year, we are proud to present the six distinctive pavilions, which showcase the unique innovations and creative spirit of each province. These pavilions demonstrate our local communities [that] continue to evolve, staying true to their roots, yet looking at the future,” siling ni Nufable.
Nagpalab-ot man sang positibo nga sabat ang mga MSMEs nga nagpasakop sa pagpatigayon sang Panubli-on kag iban pa nga trade fairs nga ginapangunahan sang DTI.
Ginpakigbahin sang consolidator sang probinsya sang Antique kag tag-iya sang Two M’s Pasalubong Center sa Bantayan, San Jose Antique nga si Jonelyn L. Medilo ang iya eksperyensya sa pagpasakop sa Panubli-on sa pila na ka tuig.
“Duro-duro gid nga salamat sa DTI hay natugruan kami kang paagi nga mashowcase ang amon product kay bahul nga bulig dya sa kada MSME kag kada producer kang Antique,” suno kay Medilo.
“Dya kami ka dya sa SM para i-showcase ang amon mga product, iba-iba nga mga produkto nga naghalin sa bahin kang Antique from north to south. Ginapabugal gid namon nga maka showcase kami ka dya kay tungod dya kami nakabuol ka bahul nga buyers,” dugang pa niya, samtang gin-imbitar ang mga nagapamasyar sa mall nga suportahan ang produkto lokal.
Samtang, si SJO4 Ernie Olendo, hepe kag Development Welfare Officer sang Bureau of Jail Management and Penology – Roxas City Jail, nga nagpartisipar bilang MSME sa Capiz, gindala ang mga produkto sang Persons Deprived of Liberty (PDL) sang BJMP Roxas City Jail- Male Dormitory.
“Si Panubli-on nakabulig gid sing dako sa amon, sa MSMEs sang BJMP Roxas City Jail-Male Dormitory, paagi sa aton mga trade fairs because ma-cater niya ang amon nga mga products locally and even there are national trade fairs,” pakigbahin ni Olendo.
“Ang obra sang aton mga PDLs is one way makit-an sang public, nga indi lang ang aton PDLs ara sa sulod sang presohan kundi nagahatag man sa ila sang livelihood program, not only for them, but also for their family. Hoping that in the next following years si Panubli-on ara gihapon magsupport,” dugang niya pa.
Maluwas sa trade fair, ang iban pa nga highlights sang Panubli-on 2024 amo ang Food Crawl nga nagaselebrar sang estado sang Iloilo bilang UNESCO Creative City of Gastronomy kag ang Grand Fashion Show nga nagpakita sang mga koleksyon sang mga lokal nga MSMEs. Ginpatigayon ang mga aktibidad humalin Nobyembre 13 tubtob 17, 2024. (AAL/AGP/PIA 6)
