SYUDAD SANG ILOILO (PIA) – Gindeklarar nga kampyon ang lokal nga panguluhan sang Passi City sa ginhiwat nga 2024 Governor’s Award for Best PESO nga isa ka tuigan nga pagpasidungog sa mga outstanding Public Employment Service Offices (PESOs) sa bug-os nga probinsya sang Iloilo.
Ara sa 18 ka mga LGUs ang nagpaindis-indis para sa pinakamataas nga distinction sa kompetisyon nga gin-organisar sang Iloilo Provincial Government paagi sa PESO – Province of Iloilo, nga nagapakita sang makabag-o nga serbisyo sa pagpatigayon sang trabaho.
Gintambungan ni Department of Migrant Workers (DMW) Assistant Secretary Levinson Alcantara ang programa sang Abril 10, 2025, kun sa diin iya ginkilala ang importante nga papel sang mga PESO sa pagtuga sang makahulugan nga mga alagyan sang trabaho kag pagpabakod sang lokal nga ekonomiya.
Ginhatagan pagtamod naman ni Iloilo Provincial Administrator Dr. Raul Banias, nga nagrepresentar kay Governor Arthur Defensor, Jr., ang mas madalom nga kahulugan sang kompetisyon.
“This search for outstanding Public Employment and Services Office, is more than just a ceremonial event, it is a tribute to the silent yet powerful work they do every day to connect people with opportunities to uplift rights and to turn hope into reality,” siling ni Banias.
Gintalupangod man niya kon paano ang kompetisyon naga-align sa MoRProGRes development agenda ni Defensor nga nagasakdag sang isa ka mabakod, progresibo, locally competitive, kag resilient nga Iloilo.
Magluwas sa Passi City nga gindeklarar nga kampyon, ginkilala man ang Tigbauan LGU bilang first place; Oton LGU (second place); Barotac Viejo LGU (third place); kag Balasan LGU (fourth place). (AAL/JNH/PIA Iloilo/kalakip ang report gikan sa Balita Halin sa Kapitolyo)
