SYUDAD SANG ILOILO (PIA) — Ginlagdaan ni Presidente Ferdinand Marcos, Jr. ang Magna Carta of Filipino Seafarers bilang pagtamod sang sakripisyo sang mga marinero kag ang ila nga kontribusyon sa pag-uswag sang ekonomiya.
Sa iya nga mensahe, ginpat-od ni Presidente Marcos ang importansya sang bag-o nga layi nga nagahatag pagtamod sa mga kinamatarong sang mga marinero.
“At its core, this new law aims to uphold the fundamental rights of our overseas seafarers: their right to fair wages, safe working conditions, and skills and competency development, amongst others,” pahayag ni Presidente Marcos.
Dugang pa sang presidente, ang mga marinero nagakadapat lamang nga mahatagan sang nagakaigo nga sweldo angot sa ila nga pagpangabudlay kag dedikasyon.
Sa bahin sang mga kondisyon sa pagtrabaho, nagpahayag ang presidente nga ang mga kompaniya indi lamang magasentro sa compliance, kundi kinahanglan nga masigurado ang kaluwasan kag proteksyon sang mga marinero batok sa pagpanghimulos kag diskriminasyon.
“Skills development is not just a provision in the law; it is about upgrading their qualifications to promote career growth, it is about providing them tools, training, and support to become more competitive both here and abroad,” sambit sang president.
Suno man kay Presidente Marcos, ang Magna Carta maga-align sa Standards for Training, Certification, and Watchkeeping (STCW) ilabi na sa pangkalibutanon nga mga kasuguan sa pagpangabudlay sa dagat.
“By creating a more robust certification process, we ensure that our seafarers are not just compliant but exceptional and equipped to meet the demands of an evolving maritime industry,” pahayag ni Presidente Marcos. (AAL/LMLE/PIA Iloilo/PND)
