SYUDAD SANG BACOLOD (PIA) — Ginpahanumdom ni Presidente Ferdinand Marcos Jr. sa opisyales sang mga lokal nga panguluhan kag mga ahensya sang gobyerno nasyonal nga kinahanglan nakabase sa siyensya ang mga plano sa pagresponde kag pag-redevelop sang mga komunidad nga apektado sang Bulkan Kanlaon.
Sa iya pagbisita sa syudad sang La Carlota sa Negros Occidental sang damlag lang, ginhatagan importansya ni Presidente Marcos ang scientific data ukon sayantipiko nga datos sa pareho short kag long-term nga mga solusyon sa krisis dala sang pag-alburoto sang Bulkan.
Ginpahayag sang Presidente nga dapat ikonsidera ang tanan nga volcanic hazards kag risgo nga ginapaguwa sang Philippine Institute of Volcanology and Seismology (Phivolcs) agud masiguro ang kaluwasan sang mga apektado nga populasyon.
“Kinahanglan kita mismo ang maghimo sang plano. Apang, sa liwat, pagatuytuyan ini sang siyensya,” hambal sang Presidente sa Ingles.
Suno sa Presidente, ang lokasyon sang ginaduso nga permanent evacuation centers kag posible redevelopment areas ang dapat luwas man sa tanan nga sahi sang katalagman, kag may mga kritikal nga pasilidad kag imprastraktura pareho sang suplay sang tubig, kuryente, dalan, sewage systems kag iban pa.
“Indi lang basta-basta kung diin ibutang [ang permanente nga evacuation centers kag redevelopment areas]… Madamo ang kinahanglan nga konsiderasyon nga dapat kaupod sa aton pagplano,” siling sang Presidente.
Dugang pa niya, kinahanglan man nga hatagan sang importansya ang palangabuhian kag trabaho sang mga pumuluyo nga madugay na sa sulod sang evacuation centers.
Iya man ginpasalig ang mga apektado nga pumuluyo nga padayon ang suporta nga ihatag sang gobyerno sa ila tubtob matapos ang ini nga krisis kag sila ang liwat nga makabalik sa ila anay nakaangdan nga pagpangabuhi. (AGP/BPS/Intern MRVA/PIA Negros Occidental)
