SYUDAD SANG ILOILO (PIA) — Gin-aprobahan na ni Presidente Ferdinand R. Marcos Jr. ang dugang sa gratuity pay sang mga Contract of Service (COS) kag Job Order (JO) nga mga empleyado sang gobyerno, ginpasakaan ang kantidad sa P7,000.
Mabaton epektibo ang dugang indi mas temprano sa Disyembre 15.
Sa apat ka pahina nga Administrative Order 28 ginlagdaan ni Executive Secretary Lucas P. Bersamin, ginpahayag ni Presidente Marcos nga ang JOs kag COS nga mga empleyado nga may kabilugan ukon aggregate nga apat ka bulan sang aktwal nga satisfactory service performance tubtub Disyembre 15, 2024 ang entitled nga magbaton sang gratuity pay humalin sa P5,000 tubtub sa P7,000.
“Granting a year-end gratuity pay to COS and JO workers is a well-deserved recognition of their hard work and valuable participation in the implementation of various PAPs of the government, and their pivotal role in the delivery of government services amidst the present socio-economic challenges,” siling ni Presidente Marcos.
Ang PAPs nagatumod sa mga programa, aktibidad kag proyekto.
Ang mga empleyado nga ang kontrata nagapabilin nga epektibo sa kasubong nga petsa ang eligible sa pagbaton sang gratuity pay.
Suno sa Department of Budget and Management ang naulihi nga dugang sa gratuity pay rate ginhatag sang 2021. Ining dugang sa gratuity pay para sa COS and JO nga empleyado ang halin sa P3,000 tubtub sa P5,000.
Ang mga empleyado nga nakapangalagad sang mas manubo sa apat ka bulan nga satisfactory service tubtub Disyembre 15 mahimo man makabaton sang FY 2024 Gratuity Pay sa pro-rata basis.
Yadtong mga COS/JO nga empleyado nga nakapangalagad sang tatlo ka bulan apang mas manubo sa apat ka bulan magabaton sang gratuity pay nga indi magsobra sa P6,000. Samtang ang yadtong nakapangalagad sang duha ka bulan apang mas manubo sa tatlo ka bulan sang serbisyo magabaton sang gratuity pay indi magsobra sa P5,000 kag ang mga nakaserbisyo sang mas manubo sa duha ka bulan makabaton indi magsobra sa P4,000.
Maga-epekto ang AO 28 sa gilayon kasunod sang kumpleto nga publication sa Official Gazette, ukon pamantalaan nga may general circulation. (AAL/LAF/PIA6-Iloilo/PND)
