SYUDAD SANG BACOLOD (PIA) — Gin-aprubahan ni Presidente Ferdinand Marcos Jr. ang dugang nga P203 milyon nga bulig para sa mga apektado sang padayon nga pag-alboroto sang Bulkan Kanlaon.
Ini ginkumpirmar ni Office of Civil Defense (OCD) Administrator Undersecretary Ariel Nepomuceno, nga nagsiling nga ang pinansyal nga bulig nga nagalab-ot sa P203,881,186 diretso nga ihatag sa mga local government units (LGUs).
Ang dugang nga pondo ginalauman nga makabulig sa mga lokal nga gobyerno sa pagpadayon sang mga serbisyo para sa ila tagsa ka mga residente nga apektado sang ini nga sakuna.
Madumduman nga masobra lima na ka bulan nga nagatinir sa mga evacuation center ang pila ka mga residente halin sang Disyembre 2024 nga paglupok sang bulkan.
Ang La Carlota City ang magabaton sang pinakadako nga kantidad sa P63,097,000. Ini para sa mga pagkaon, tubig, kag utilities sang internally dispplaced persons (IDPs), kag pag-improbar sang mga pasilidad sa evacuation centers.
Ang Himamaylan City naman, kung sa diin ginatukod ang Tent City, makabaton sang P62,539,736; La Castellana nga may P48,521,100; kag Canlaon City, Negros Oriental nga may P29,723,350.
Siling ni Nepomuceno, ang ini nga dugang nga bulig pinansyal gikan sa P20 bilyon nga National Disaster Risk Reduction and Management (NDRRM) Fund, pero iya ginhambal nga ang ini nga budget madasig lang nga mabuhinan, ilabi na sa tion sang tig-ululan.
Dugang pa sang opisyal, wala nahibaluan kung san-o liwat magalupok ang bulkan, gani ginatinguhaan gid nga magamit sang insakto ang pondo.
Ginalauman man ni Nepomuceno nga mahatag na ang dugang nga bulig sa pinakalapit nga panahon, bilang pagpasalig sa mga apektado nga Negrosanon nga yara ang gobyerno nasyonal nga naga-atipan kag nagahatag sang ila kinahanglanon sa tunga sang ini nga krisis. (AGP/BPS/PIA Negros Occidental)
