SYUDAD SANG ILOILO (PIA) – – Ginhatagan pagtamod ni Presidente Ferdinand R. Marcos Jr. ang mga pagpanikasog sang gobyerno nga magapadulong sa pagtaas sang sweldo sa pribado kag publiko nga mamumugon sa Pilipinas.
“With tripartite consensus, minimum wage levels have been increased in various sectors in all regions, including the BARMM, for workers in private establishments. Makakapagdulot ito ng ginhawa sa mahigit apat na milyong mga kababayan natin at kanilang mga pamilya,” siling sang Presidente sa iya 3rd State of the Nation Address (SONA) sa House of Representatives sang Hulyo 22.
Sa pihak nga bahin, ginsiling man sang Punong Ehekutibo nga ang mga empleyado sang gobyerno makalaum sang “medical allowance” kag pagtaas sa sweldo bilang dugang nga benepisyo.
“Para naman sa ating mga kawani ng gobyerno, mayroon silang maaasahang medical allowance bilang karagdagang benepisyo sa susunod na taon,” pahayag sini.
Gindugang man sini nga may yara sang ginapaabot nga pagsaka sa sweldo nga makuha nila sa apat ka tranches. May ginpain na nga pondo para diri sumugod sini nga tuig kag sa masunod nga mga tuig.
Ginpahayag man ni Presidente Marcos nga ang administrasyon nagpalawig man sang serbisyo sang mga job orders kag contract of service personnel, nga naghatag sa ila sang oportunidad nga mahikot ang ila civil service eligibilities samtang nagakuha sang dugang nga nagakaigo nga eksperyensya kag paghanas agud mapaayo pa ang ila kwalipikasyon sa empleyo.
Ginhinambit man sang Presidente nga ang employment rate sa Pilipinas ang nagsaka sa 95.9 ka porsyento upod ang mataas nga kalidad sang trabaho samtang ang underemployment nagnubo humalin sa 11.7 ka porsyento sang Mayo 2023 tubtub 9.9 ka porsyento, pinakanubo humalin sang tuig 2005.
Ginhinambit man sini ang pagtaas sa middle-skilled employment, wage kag salaried employment kag full-time nga mga trabaho.
Ang President naghatag man pagtamod sa mga adaptive kag responsive social protection program nga nagabulig sa mga pumuluyong Filipino sa tion sang tuman nga kakinahanglanon, ginalab-ot yadtong yara sa mga malayo nga lugar. Tinutuyo man sini nga mapaayo ang ila produktibo nga potensyal kag mapaayo ang ila kapasidad padulong sa self-sufficiency.
“Magagandang balita pa rin ang mga ito, sa kabila ng nararanasang mataas na presyo ng pagkain. Bukod sa paglikha ng trabaho, pinalalakas din natin ang kakayahan ng ating mga mamamayan, lalo na sa panahon ng kanilang kagipitan,” pahayag sang Presidente. (AAL/LAF/PIA6-Iloilo/PND)
