SYUDAD SANG ILOILO (PIA) — Ginmando ni Presidente Ferdinand R. Marcos Jr. ang pagdugang sa subsistence allowance para sa mga opisyal kag enlisted personnel sang Armed Forces of the Philippines (AFP).
Sa idalum sang Executive Order (EO) 84 nga ginlagdaan sang Marso 14 ang subsistence allowance retroaktibo magataas sang P350 humalin sa P150 sumugod sa Enero 1, 2025.
“It is imperative to increase the Subsistence Allowance of all Officers and Enlisted Personnel of the AFP, to protect and promote their welfare, in recognition of their sacrifices and perseverance, in defending and upholding the country’s sovereignty and territorial integrity,” nasaad sa mando.
Suno sa EO ang karon nga subsistence allowance sang mga militar ang indi na bastante agud masabat ang matag-adlaw nga kinahanglanon sang isa ka active-duty nga soldado nga kinahanglanon sa ila kaayuhan kag sa paghimo sang ila mga katungdanan.
Ang subsistence allowance sang AFP ang ulihi nga gin-adjust sang 2015 santo sa Joint Resolution No. 5 (s. 2015) sang Kongreso.
Sakop sining dugang ang mga trainees kag probationary second lieutenants/ensigns nga nagapaidalum sa paghanas, Citizen Military Training cadets kag reservists.
Ang pagagamiton nga pundo ang magahalin sa available appropriations para sa AFP sa idalum sang General Appropriations Act for Fiscal Year 2025 (Republic Act No. 12116) kag iban pa nga funding sources nga ginkilala sang Department of Budget and Management.
Igalakip man sang AFP ang funding requirements sa pagpadayon sa implementasyon sining dugang sa iya mga palaabuton nga mga budget proposal.
Gilayon nga mangin epektibo ang mando kung mabalhag sa Official Gazette ukon pamantalaan nga may general circulation. (AAL/LAF/PIA Iloilo/PND)
