SYUDAD SANG ILOILO (PIA) — Ginlagdaan na ni Presidente Ferdinand R. Marcos, Jr. ang Akta Republika Numero 12199 nga nagahatag prayoridad sa temprano nga edukasyon, husto nga nutrisyon kag ma-atipanon nga suporta agud mahatagan ang mga kabataan nga Filipino, ilabi na yadtong nagapang-edaron zero tubtub lima ka tuig, sang mas mabaskog nga umpisa sa kabuhi.
Ginlagdaan sang Mayo 8, ang RA No. 12199, ukon “Early Childhood Care and Development System Act,” nga ginpasar sa implementasyon sang polisiya sang estado nga mabantayan kag mapalapnag ang kinamatarong sang tagsa ka bata sa holistic well-being, growth kag dedikado nga pag-atipan.
Isa ang ECCD System Act sa mga nagapanguna nga measure ginrekomendar sang Second Congressional Commission on Education (EDCOM 2) para mapaayo ang sistema sang edukasyon sa pungsod kag sakdagon ang kinamatarong sang tagsa ka bata sa holistic care kag development.
Gindula sang bag-o nga layi ang RA No. 10410, ukon kilala bilang “Early Years Act (EYA) of 2013.”
Ang RA No. 12199 nagpahamtang sa ECCD Council nga atipanon ang mga kabataan nga wala pa sang lima ka tuig samtang ang Department of Education (DepEd) pagadumalahan yadtong mga nagapang-edaron lima tubtub walo ka tuig kaangut sa Enhanced Basic Education Act of 2013.
Santo sa mando sang RA 12199, ang ECCD ang iga-institutionalized sa kumprehensibo, integrative, kag tayuyon nga pamaagi pinaagi sa multi-sectoral kag inter-agency collaboration sa nasyunal kag lokal nga lebel sa gobyerno upod ang iban pa nga tagsakdag.
Sa idalum sang RA No. 11650, “the ECCD System promotes inclusive education by ensuring children with disabilities receive proper services, reasonable accommodation, and accessible environments”.
Tinutuyo sang kasuguan nga mabuhinan ang child mortality, suportahan ang tanan nga bahin sang child development, ihanda ang mga bata para sa pormal nga pagbutho kag magtukod sang mga early intervention system sa mga yadtong may espesyal nga kinahanglanon.
Ang ECCD Council ang pabaskugon agud pangunahan ang ikaayong lawas, nutrisyon, edukasyon kag mga social development program nga may mabaskog nga koordinasyon sa mga ahensya.
Magadala sang importante nga bahin ang lokal nga panguluhan sa implementasyon sang mga ECCD program pinaagi sa ila natungdan nga mga talatapan sang ECCD. (AAL/LAF/PIA Iloilo/PND)
