SYUDAD SANG ILOILO (PIA) — Ginlagdaan ni Presidente Ferdinand R. Marcos Jr. ang layi nga nag-amyendar sa “Motorcycle Crime Prevention Act,” nga naga-require sa mga bag-o nga tag-iya nga masaylo ang pagpanag-iya sang motorsiklo sa sulod sang 20 working days.
Ginlagdaan sang Mayo 9, ang bag-o nga kasuguan nga naga-amyendar sa Seksyon 4, nagabuhin sa multa para sa pila ka partikular nga paglapas, nga nagatuyo nga mapaayo ang pagsunod samtang ginapapatigayon ang responsable nga pagpanag-iya sang motorsiklo.
Ginamando sang Akta Republika 11235 nga iparehistro sang mga motorcycle owner ang ila motorsiklo sa Land Transportation Office (LTO) sa sulod sang lima ka adlaw pagkatapos makuha ang pagpanag-iya.
Ang silot kag multa ang ginbag-o man para sa dealer, original owner, ukon bag-o nga tag-iya kung mapaslawan sila nga magsunod.
Humalin sa silot nga pagkabilanggo ukon multa nga indi magnubo sa PhP20,000 apang indi magsobra sa PhP50,000, ukon pareho, ginbuhinan ini sang bag-o nga layi sa multa nga indi magsobra sa PhP5,000.
Wala sang pag-embargo nga matabo base lamang sa indi pagsunod sang nagbakal sa ginapangayo sang kasuguan.
Ginamando man sang R. A. 11235 sa mga dealer nga i-report ang tanan nga na-embargo nga motorsiklo sa LTO kag magsumiter sang annual status report sang mga repossessed unit sa idalom sang ila kustodiya.
Subong man, ginarequire sa karon sang Seksyon 5 nga ang mga motorsiklo may mas daku, mabasahan kag color-coded number plates.
Ang mga driver nga wala sang number plates nagapangatubang sa karon sang manubo nga multa sang tubtub PhP5,000, sa baylo sang orihinal nga PhP50,000 tubtub PhP100,000 ukon pagkabilanggo.
Suno sa layi nga wala sang pag-embargo nga matabo kung ang tag-iya magpresentar sang proof of registration kag wala sang kasal-anan sa pagkadula ukon indi mabasahan nga plaka.
Nakasaad man sa layi “Section 11 lowers the penalty for failing to report lost number plates from up to PhP50,000 to a flat fine of PhP5,000. Meanwhile, Section 12 penalizes tampering or misuse of plates with 6 months to 2 years imprisonment, a fine up to PhP10,000, or both.”
Kasubong man nga silot kag multa ang igapatuman sa mga tawo nga may nahibaluan sa pagbaligya ukon pagbakal sang mga erased, tampered, altered, forged ukon imitated number plate ukon readable number plate. (AAL/LAF/PIA Iloilo/PND)
