BACOLOD CITY (PIA) — Naghatag sang direktiba si Presidente Ferdinand Marcos Jr. kay Department of Health (DOH) Secretary Teodoro Herbosa nga siguraduhon ang pagpadayon sang mga serbisyo sang PhilHealth.
Sa iya pagpirma sang 2025 national budget sang Disyembre sang nagligad nga tuig, ginsiguro ni Presidente Marcos nga magapadayon ang PhilHealth sa paghatag sang iya sini mga serbisyo apisar sang zero subsidy gikan sa budget.
“Make sure that services of PhilHealth remain unhampered … it (zero budget) should not affect the delivery of healthcare services,” hambal ni Presidente Marcos kay Sec. Herbosa.
(Siguraduhon naton nga tayuyon ang mga serbisyo sang PhilHealth… indi ini (zero budget) dapat magpamalabag sa paghatag sang healthcare services.)
Ginhambal man sang Presidente nga ginhatagan sang mas dako nga importansya sang iya administrasyon ang social services sa 2025 national budget.
Ini nga mga social services ginalakipan sang mga sektor sang edukasyon, public health, economic services, imprastraktura, kag agrikultura.
Suno sa Presidente, kinahanglan nga hatagan sang mas dako nga igtalopangod sang DOH ang mga tikang agod makalikaw sa mga sakit ang publiko, bangod “an ounce of prevention is better than a pound in cure.”
Para man mas mapaayo kag mapasangkad ang paghatag nila sang serbisyo, ginhambal ni Presidente Marcos nga makabulig sa DOH ang digitalisasyon. (AGP/BPS/ PIA Negros Occidental/Presidential Communications Office)
