SAN JOSE, Antique (PIA) – Ginpangunahan ni Presidente Ferdinand Marcos Jr. ang pagpanagtag rugya kang Presidential Assistance to Farmers, Fisherfolk, and Families (PAFFF) kang Hunyo 27.
Kaimaw pira sa mga miyembro kang anang Gabinete, nagtugro si Presidente Marcos kang masobra P70 milyones sa 7,067 ka mga Antiqueño nga mangunguma kag manugpangisda nga nakabaton P10,000 kada sara.
Sa sangka press briefing, ginhambal ni Presidential Communications Office (PCO) Assistant Secretary for Television Dale De Vera nga ang mga benepisyaryo kang PAFFF mga mangunguma nga naka rehistro sa Department of Agriculture (DA) kag nagdeklara kang pagkalugi bangod sa El Niño.
Dugang hambal ni De Vera, personal nga nagalibot sa mga probinsya ang Presidente para ipakita ang dedikasyon na kag kang gobyerno sa paghatod kang bulig sa mga Pilipino nga bahul nga naapektohan kang tag-irinit.
Sa anang parte, ginpasalamatan ni Gov. Rhodora J. Cadiao si Marcos sa anang pagbalik sa Antique sa ikatlo nga ti-on kag liwan nga pagdara kang ayuda sa mga Antiqueño.
Ginpalab-ot man kang Gobernadora ang anang mainit nga pag-abi-abi sa pag bisita sa probinsya kang Presidente kag mga miyembro kang anang Gabinete.
Dugang sa Presidential assistance, nakabaton man kada sara ka mga benepisyaryo kang lima ka kilo nga bugas halin sa opisina ni House Speaker Ferdinand Martin Romualdez, kag dugang nga lima ka kilo halin sa gobyerno probinsyal kang Antique paagi sa opisina ni Cadiao.
Samtang, nagpanagtag man ang Department of Agriculture (DA) kag Department of Social Welfare and Development (DSWD) kang iban pa nga bulig sa anda tagsa ka mga benepisyaryo.
Kaimaw ni Presidente Marcos sa ginpatigayon nga PAFFF distribution sa Binirayan Sports Complex sanday Special Assistant to the President Sec. Antonio Lagdameo Jr., DA Sec. Francisco Tiu-Laurel Jr, DSWD Sec. Rexlon Gatchalian, Department of the Interior and Local Government (DILG) Sec. Benjamin Abalos Jr., Senate President Pro Tempore Loren Legarda, Antique Congressman Antonio Legarda Jr. kag iban pa.
Samtang, nag-abot man sa probinsya ang mga gobernador sa Panay kag Guimaras para batunon halin sa Presidente ang anda nga parte sa Presidential assistance nga magabulig sa masobra 61,000 ka mga mangunguma kag manugpangisda sa rehiyon.
Pagkatapos kang programa sa Antique, nagdiretso si Marcos sa Negros Occidental para sa isa pa gid ka ceremonial PAFFF distribution. (AGP/BPS/PIA Antique)
