TAGBILARAN CITY, Bohol (PIA) — Sa labing una nga higayon, mohimo sa iyang opisyal nga pagbisita sa Bohol si Presidente Ferdinand Marcos Jr., alang sa ceremonial nga pagpang-apud-apod sa Presidential Assistance to Farmers and Fisher folks and their Families (PAFFF) sa usa ka seremonyas didto sa CPG Sports Complex, Hunyo 28.
Gibanabana nga moabut sa 7,634 ka mga mag-uuma, mangingisda ug ang ilang mga banay ang makadawat sa hinabang nga gikan sa Buhatan sa Presidente, segun pa ni Presidential Communications Office Assistant Secretary Joey Villarama atul sa media briefing sa PAFFF, didto sa Bougainvilla Hall sa JJs Seafoods, usa ka adlaw sa dili pa mahitabo ang pagbisita.
Hinuon, para sa adlaw sa pagpanghatag, 10 pa lamang ka benepisaryo sa Bohol ug 10 usab sa Sugbo ang makadawat sa cash o tseke nga nagkantidad og P10,000, samtang ang uban, ipang-apud-apud ra sa mga local government units (LGUs) sa sunod nga usa ka buwan, dugang ni Villarama didto sa briefing.
Usa ka tseke nga naglangkob sa kinatibuk-ang kantidad sa ihatag sa Presidente alang sa PAFFF ang dawaton usab sa local nga mga tinugyanan kinsa mao nay mopa-apud-apud sa bahin sa matag usa subay sa listahan nga nahipno na.
Ang hinabang, mahimong ikapamalit og dugang abono, ikapadaro, ikapalit og binhi o ipalit og pagkaon para sa banay, sugyot ni Villarama.
Usa ka inisyatiba sa Office of the President nga opisyal nga gipasugdan niadtong Mayo 9 didto sa Zamboanga Peninsula, ang pagpang-apud-apod didto sa Zamboanga City, nga gituyo alang sa mga nabiktima sa taas nga lanat sa huwaw, gidayo sa mga mayors ug gobernador sa mga silingan nga LGUs kansang mga konstituwente, naha-apil sa nahisgutang hinabang, saysay ni Villarama.
Samtang minggamit sa pundo sa Buhatan sa Presidente, matud ni Villarama nga ang tibuok nasud angayan nga katabangan apan sa 82 ka mga lalawigan, una nga gitutokan kadtong mas grabe ang kahimtang human sa El Nino.
Matud ni Villarama, sa iyang kasinati-an, may mga lalawigan nga gihatagan og P10 milyones, aduna usay gihatagan og P50 milyones alang sa hinabang sa Presidente.
Gipasabut usab niya nga may mga lugar usab nga ang hinabang sa Presidente, ngadto nipaingon sa ubang mga napatuman na nga proyekto sa kagamhanan nga gipaagi sa Department of Social Welfare and Development, Department of Trade and industry, Technical Education and Skills Development Authority, Department of Labor and Employment, Philippine Center for Post Harvest and Mechanization (PhilMECH) ug sa Department of Agriculture uban sa iyang mga kaabin nga buhatan.
Alang sa Bohol, ang kapin sa 7 mil ka mga benepisaryo, gipili gikan sa listahan sa mga mag-uuma ug mga mangingisda nga gikan sa mga kalungsuran nga nakadeklara sa pagkadaut sa ilang mga panginabuhian, pasabut ni Villarama.
Kini nga listahan, matud niya, gitandi usab sa listahan sa DSWD aron dili na madoble pa ang panghatag ug mas daghan ang maabut.
Kini nga listahan usab, gitabangan og hapsay sa mga LGUs, hinungdan nga may mga lungsod nga uwahi nga nakaduso sa ilang mga taho sa kadaut sa panginabuhian, nga wala makapasulod og mas daghang benepisaryo.
Gawas sa saad sa hinabang, segurado hinuon nga mabitbit sa mga motambong sa kalihukan ang lima ka kilo nga bugas nga gikan sa mga Kongresista sa matag Distrito sa Bohol, ug pagkaon sa mga mitambong.
Ang pagbisita sa Presidente dinhi sa Bohol, gihost sa Tagbilaran City uban ni Mayor Jane Yap ug Provincial Government sa Bohol uban ni acting Gov. Dionisio Victor Balite. (RAHC/PIA Bohol)
