SYUDAD SANG ILOILO (PIA) — Agud mapasiguro ang ikaayong lawas sang sang mga bata sa nahauna nga 1,000 nga adlaw sini, ginmanduan ni Presidente Ferdinand R. Marcos Jr. ang paglakip sang mga nagabusong kag nagapadede nga mga kababainhan sa coverage sang Pantawid Pamilyang Pilipino Program (4Ps).
Nagpakigkita si Presidente Marcos sa National Economic and Development Authority (NEDA), Department of Social Welfare and Development (DSWD), Department of Health, kag iban pa nga mga ahensya sa Malacañang para i-presenta ang mga pagtuon kag rekomendasyon sa pagreporma sang 4Ps cash grants.
Madumduman nga sa isa ka pagpulong sa ginapanugda nga reporma para sa mga 4Ps nga ginhiwat sang Pebrero, ginproponir sang DSWD ang pagtaas sang 4Ps grant sa First 1,000 Days (F1KD) sang mga bata. Ang ini nga adjustments magapataas sang purchasing power sang mga benepisyaryo sang 4Ps kag magahatag insintibo nga ma-improbar ang compliance sang kondisyon sang programa nga makatapna sang malnutrition kag stunting.
“Okay. Yes. Let’s do that. On the first 1,000 days of a child’s life, bring the mother, the family into the system. That’s really good,” pahayag sang presidente.
Sa ini nga programa, makabaton ang benepisyaryo sang 4Ps sang daycare kag elementary grant nga nagabalor P300 sa tagsa ka bata sa masulod ka pulo ka bulan, conditional sa attendance sang kabataan sa buluthuan; P500 naman kada bata sa sulod sang 10 ka bulan para sa junior high school nga conditional man sa attendance sang kabataan sa buluthuan; P700 para sa tagsa ka bata sa masulod sang 10 ka bulan sa senior high school nga may kapareho nga kondisyon.
Samtang, yara naman sa P750 kada bulan ang ihatag sa mga panimalay sa masulod sang isa ka tuig, apang kinahanglan nga ang mga kabataan nga naga-edad 2-14 katuig yara sa estado sang under growth development kag monitoring kag nagakinahanglan sang deworming kag magtambong sa family development sessions. (AAL/LMLE/PIA Iloilo/PND)
