Personal nga gitambongan nila ni Presidente Bongbong Marcos, Kongresista Maria Vanessa Aumentado, Gobernador Erico Aris Aumentado, Kongresista Kristine Alexie Tutor ug Kongresista Edgar Chatto ang lagdaay sa pormal nga pagtugyan sa kagamhanan sa pagdumala sa Bohol Panglao International Airport ngadto sa pribadong partner niini nga Aboitiz InfaCapital. (PIMO)
TAGBILARAN CITY, Bohol (PIA) – Nanguna si Presidente Ferdinand “Bongbong” Marcos Jr. sa makasaysayanon nga Formal Signing sa Bohol-Panglao International Airport (BPIA) Public Private Partnership (PPP) Project Concession Agreement, tali sa Aboitiz infra Capital (AIC).
Ang AIC, kinsa maoy nakadaug sa bidding ug mao nay mopahigayon sa pagdumala sa Operation ug Maintenance sa Bohol-Panglao International Airport (BPIA) sugod karong Hunyo 11, 2025.
“Karon, atong gipahigayon ang pormal ug opisyal nga pagpirma sa BPIA Public Private Partnership Project Concession Agreement dinhi sa Malacañang Palace Disyembre 18, ” taho ni Aumentado, sa iyang mensahe atul sa kalihukan.
Mapasalamaton si Aumentado ngadto kang Pangulo Ferdinand Romualdez Marcos Jr., sa pagbukas niini sa pagdumala sa BPIA ngadto sa pribadong kompanya, kay wala kaayo’y kasinatian ang goberno sa pagpadagan sa maayong serbisyo sama sa airport operations.
Sa katikaran, uban sa mga hingtungdang ahensya sa Nasudnong Kagamhanan nga nahimong kabahin sa proseso, malipayon ug mapasalamaton ang gobernador nga mapamaayo na ang pagdumala sa airport nga daw nabiyaan human kini gikatugyan, pila na ka tuig ang milabay.
Matud sa gobernador, dako ang ikatampo sa mas maayo nga airport operations alang sa pagkapili sa lalawigan sa Bohol isip ang kinaunhang UNESCO Global Geopark sa Pilipinas, kay ang tugpahanan maoy pultahan nga agi-an sa mga mosubay sa geoparks.
Tungod niini, ubos sa administrasyon ni PBBM, matud ni Aumentado nga mas dako ug mas napalapad pa ang oportunidad sa industriya sa transportasyon, dili lang dinhi sa nasod.
Kahinumduman ang infrastructure arm sa Aboitiz Group mipadayag nga nadawat na nila ang notice of award gikan sa Department of transportation and Civil Aviation Authority of the Philippines niadtong Nobyembre 18, 2024.
Ang Panglao Bohol airport maoy ikaduhang tugpahanan nga gitugyan sa kagamhanan sa Aboitiz InfraCapital, human ang Laguindingan International Airport sa Misamis Oriental.
Sa formal signing nga gitambongan ni Aumentado, gitagana ang P 4.53 bilyones ang gastohon sa Aboitiz InfraCapital alang sa BPIA, nga karon ika siyam nga labing busy nga tugpahanan sa nasud.
Ang kantidad gamiton alang sa pagpalapad sa passenger terminal building, pagpahimutang sa mga gikinahanglang ekipo, pagmoderno sa pasilidad nga habig sa Runway ug kadtong nia sa pikas nga kilid, kini tanan sulod sa pagdumala sa Aboitiz InfraCapital sa 30 ka tuig nga kasabutan.
Tumong sa AIC nga buksan ang mga maayong pasilidad sa tugpahanan aron kini dugokon usab sa mga mamumuhunan, gilauman nga moabot sa 1.5 milyones ka mga pasahero ang molabay sa nahisgutang tugpahanan sa matag tuig, sulod sa unang duha ka tuig nga pagdumala.
Ang BPIA mao na ang gihimong agianan sa Aboitiz InfraCapital (AIC) aron mapaugmad niini ug madumala ang mga imprastraktura sa kagamhanan ug hatagan sa kasayon ang pagbyahi, ilabi na pagsulod sa bohol nga gidugok sa mga turista.
Subay niini malaumon si Gob. Aumentado nga ang pagpanindot sa serbisyo ug pasilidad sa panglao Bohol International Airport makapadugang pa inganyo sa bohol sa mga turista, nga makatabang usab sa pagpabarug sa mga mga establishmento ingon man mga pasilidad sa pag Alagad sa mga bisita nga maghatag og dugang kapanarbaho-an
Atol sa formal signing sa PPP Project Concession Agreement, didto sila Gob.. Aris Aumentado, 2nd Dist. CongW. Ma. Vanessa Aumentado, Cong Edgar Chatto, Cong Alexie Besas Tutor, Panglao Mayor Edgardo Arcay, ubang mga elected ug appointed Officials gikan sa Provincial Government, Sabin Aboitiz- President & CEO of Aboitiz Group of Companies, Korean Ambassador to the Philippines, ug ubang mga Officials gikan sa private sector. (RAHC/PIA Bohol)
