SYUDAD SANG ROXAS, Capiz (PIA) — Mas ginpasangkad sang Philippine College of Endocrinology, Diabetes, and Metabolism Thyroid Disorder Advocacy Council (PCEDM) kag mga doktor sa probinsya ang kampanya para sa thyroid health awareness pinaagi sang duha ka adlaw nga fora bilang pagselebrar sang Goiter Awareness Week 2025.
Tinutuyo sang aktibidad nga mas pasanyugon ang ihibalo parte sa thyroid health, maghatag sang libre nga serbisyo medikal, kag magtipon-tipon ang mga healthcare professionals kag ang mga miyembro sang komunidad para matapna ang problema sa thyroid health.
Nagpatigayon sila sang Medical Forum sa una nga adlaw, kon sa diin ginpresentar sang mga eksperto ang mga importante nga topiko nga kaangot sa Philippine Iodine Nutrition Status and Salt Iodization Program, kag Thyroid Disorder Diagnosis and Management.
Samtang, sa ikaduha nga adlaw, nasentro ini sa publiko, kon sa diin ginhiwat ang Lay Forum para sa mga barangay health workers (BHWs) kag mall-goers sa Robinsons Activity Area sa Roxas City kag may mga libre nga pagpatigayon sang thyroid-stimulating hormone (TSH) screenings, kag thyroid checks.
Subong man, ginpangunahan sang Salinas Foods, Inc. kag ThyroMobile ang iodine content testing para sa mga household salts.
Sa pihak nga bahin, ginkilala ni Dr. Ramon Alex Nolasco, Provincial Health Officer II sang Provincial Health Office, ang importansya sang iodine monitoring sa probinsya kag gin-anunsyo nga nagaplano ang PHO nga magbakal sang iodine checker machines.
Ginhatagan man niya sang pag abi-abi ang mga BHWs nga nagtambong sa Lay Forum kag ginpahayag nga bilang mga health promotion officers sa tagsa nila ka barangay, ginalauman niya nga mas madugangan pa ang ila ihibalo sa topiko.
“As health promotion officers, we are focused on the non-communicable diseases program, this will inspire all of you, ang mga BHW because hindi lang diabetes, hindi lang hypertension, may ara gali kita ginatawag nga thyroid problem,” dugang pa sini.
Suno sa Food and Nutrition Research Institute sang Department of Science and Technology sang 2018, nakita nga kulang ukon insufficient ang iodine intake sang mga lactating mothers sa probinsya kag may ara lang 24 percent nga urinary iodine excretion (UIE) levels nga manubo sa 50 ug/L.
Dugang pa ni Nolasco nga bilang isa sa mga interventions sang provincial government, nagpasa ang Provincial Nutrition Council sang Executive Order sa pagpa-organisa sang Capiz Provincial Bantay Asin Task Force agud mas ma-monitor ang implementasyon sang salt iodization program kag RA No. 8172 ukon Asin Law sa probinsya. (AGP/PLF/PIA Capiz)
