Si Presidential Commission for the Urban Poor (PCUP) Commissioner Reynaldo P. Galupo (center) mipadangat sa ilang mga livelihood programs alang sa urban poor, atol sa gipahigayon nga press conference uban ang Cebu local media niadtong Pebrero 4 sa Cebu City. (RGC/PIA7 Cebu)
CEBU CITY, Cebu (PIA) – Ang Presidential Commission for the Urban Poor (PCUP) ug ang Department of Labor and Employment 7 (DOLE-7) magtanyag og mga nagkadaiyang integrated livelihood programs alang sa mga urban poor ug urban poor organizations sa Central Visayas.
Sa gipahigayon nga press conference sa Cebu City niadtong Pebrero 4, gibutyag ni PCUP Commissioner Reynaldo P. Galupo ang plano sa ilang komisyon nga magpatuman og mga proyektong pangkinabuhian nga nagtumong nga tabangan ug palambuon ang kahimtang sa kinabuhi sa mga urban poor sa Central Visayas.
Gipaambit usab sa opisyal ang uban pang mga plano sa PCUP pag-abag sa urban poor sa mosunod nga tulo ka tuig.
Matod ni Galupo, ang PCUP nangita sa pagkakaron og 100 ka mga benepisyaryo gikan sa urban poor sector nga mahatagan sa nagkadaiyang programa og proyekto sa panginabuhian nga gitanyag sa komisyon pinaagi sa pakig-alayon sa DOLE.
“Mamimili kami ng 100 beneficiaries, pag maayos na yan, hihingan namin ng mga requirements yan. Tapos isa submit namin yan sa DOLE. Tapos sasalain ng DOLE yan para malamin nila kung qualified ba o hindi,” batbat ni Galupo.
“Nais lang namin ipaalam na hindi qualified sa naturang programa yong mga tumatanggap na ng mga benepisyo sa mula sa ibang ahensya ng gobyerno gaya ng 4Ps,” dugang niya.
Pipila sa mga requirements nga kinahanglan isumiter sa mga benepisyaryo mao ang ‘Government Issued ID’ ug ‘Beneficiary Profile Form with attached photo.’
Sa pagpatuman sa mga livelihood programs ug projects, giklaro usab ni Galupo nga kini dili ayuda alang ngadto sa mga kabos, kung dili kini paagi sa komisyon sa pagtuman sa ilang mandato.
“Sa pagpapatupad ng aming mga programa, pinapatay namin ang konsepto ng ayuda, hindi kami nagbibigay ng ayuda. Dahil ito ay gawain ng mga ahensya dahil ito’y mandato namin. Kaya kami nakipag-ugnayan sa DOLE dahil hindi naman kaya ng ahensya na kilalanan ang lahat ng urban poor sa bansa at nagkataon na ang ang mandato ng PCUP ay e-identify kung sino-sino ang nasa sektor ng mga mahihirap,” ang PCUP commissioner miingon.
Lakip sa mga livelihood projects nga mapahimuslan sa mga urban poor ug urban poor organizations mao ang ‘Negosyo sa Kariton’, ‘Motorized boats’ nga ubos sa kategorya nga ‘individual projects’ kung diin ang mga kwalipikadong benepisyaryo makadawat ug grant assistance nga nagkantidad gikan sa P50,000 ngadto sa P80,000.
Samtang mahimu usab makapahimus ang mga benepisyaryo sa mga micro, small, and medium livelihoods ubos sa kategorya nga ‘group projects’ diin ang grant assistance nga itunol nagkantidad gikan sa P1,000,000 ngadto sa P3,000,000.
Matod sa DOLE ug PCUP, lakip usab sa mga sektor nga makapahimus sa maong programa mao ang Indigenous People (IPs) ug mga ginikanan sa mga child laborers nga giprofile sa DOLE.
Gawas sa mga livelihood projects, ang komisyon nagpahigayon usab ug mga seminar aron sa pag-edukar sa mga urban poor organizations kabahin sa technical writing ug sa mga parlamientary rules ug procedures.
Saysay sa PCUP, adunay dul-an sa 400 ka mga urban poor organizations sa Central Visayas kansang mga nag-unang panginahanglanon mao ang pabalay, edukasyon, ug oportunidad sa panginabuhian. (RGC/PIA7 Cebu)
