NEGROS OCCIDENTAL (PIA) — Ginhingyo sang isa ka mataas nga opisyal sang gobyerno ang mga Negrosanon nga magtago sang kwarta sa bangko tungud luwas ini sa sunog kag pagpangawat.
Ginpahayag ni Jose Villaret Jr. nga Vice President for Corporate Affairs Group sang Philippine Deposit Insurance Corporation (PDIC) sang ginhiwat ang ‘PDIC 101: Understanding Deposit Insurance’ para sa mga katapo sang media, nga ginapahulam sang bangko ang kwarta sang mga nagadeposito agud makaganansya kag mabayran ang interes sang ila kliyente.
Ang kwarta sang mga nagadeposito napaidalum sa PDIC kag sarang maibalik ini sa ila kliyente kon hinali magsara ang bangko tubtob sa P500,000 nga kantidad.
Nahibaluan nga ang total nga nagadeposito sa Pilipinas nag lab-ot na sa P19.1 trillion kag 18.5 ka porsiyento sini ang napaidalum na sa insurance o P3.53 trillion.
Ang total nga deposit account sa pungsod nagdangat sa 126. 2 ka milyon kag 97.5 ka porsiyento sini ang napaidalum man sa insurance, suno kay Villaret.
Gindugang pa sang opisyal sang PDIC nga ang pagtago sang kwarta hindi lamang para sa mga may sarang kundi para man ini sa mga imol kag sarang ini magamit sa tion sang emerhensya kag sa hindi mapaktan nga mga sirkumstansya.
Sa iya powerpoint presentation, makita nga sa bilog nga Association of South East Nation (ASEAN), Pilipinas ang may pinakanubo nga savings ikumpara sa iban sini nga kaingod nga pungsod kaangay sang Singapore, Indonesia, Malaysia kag Thailand.
Ginpahibalo man ni Villaret sa mga Negrosanon nga magpili sang bangko nga masaligan kag may maayo nga reputasyon gani dapat man nga hibaluon sang mga nagadeposito ang mga produkto kag polisiya sang ila bangko.
Nagpaandam man siya batuk sa mga programa sang mga financial institutions nga nagahatag sang tuman ka taas nga interes kay basi makatuga ini sang kalainan.
Ang PDIC nagapasanyog sang ihibalo sang mga Pilipino paagi sa financial literacy o kinaadman pinansyal, suno sa iya.
“Hindi namon luyag nga makilala lang gid kami bilang mga “propeta sang kadudulman” kon diin makita lamang kami kon may inugsara nga bangko. Yari kami agud proteheran ang inyo mga tinago nga kwarta sa bangko,” pahayag ni Villaret. (AAL/LOLJr/PIA Negros Occidental)
