SAN JOSE, Antique (PIA) – Nagapahanumdom sa publiko ang Antique Provincial Disaster Risk Reduction and Management Office (PDRRMO) nga mag-uligmat kag magsunod sa abiso kang mga otoridad ilabi ron sa pagsulod kang La Niña.
Sa sangka mensahe, nagpangandam ang hepe kang Antique PDRRMO nga si Broderick Train sa mga Antiqueño kang posible nga mangin kahalitan sa probinsya kung mag-umpisa ron ang La Niña.
Hambal ni Train, importante ang pagsunod sa mga abiso kang mga ahensya kang gobyerno para masiguro ang kahilwayan kang mga pumuluyo sa tion kang kalamidad.
Ana man gintugruan igtalopangod ang mas mabaskog nga koordinasyon kag komunikasyon sa tunga kang mga local DRRM units halin sa mga barangay paadto sa probinsyal nga lebel.
“Mas timprano, mas nami nga mag-convene ang aton mga local DRRM halin sa barangay, munisipyo, kag sa provincial government para maistoryahan kung ano pa ang dapat preparahan, especially kadya nga tag-ururan,” hambal ni Train.
Suno sa opisyal, importante man nga permi bukas ang DRRM offices sa mga komunidad para gilayon nga makabulig sa kinahanglan kang mga residente sa tion kang kalamidad kag emerhensya.
Sa sangka abiso Philippine Atmospheric, Geophysical, and Astronomical Services Administration (PAGASA) kang Sept. 25, may 71 porsyento nga mag-develop ang La Niña sa September-October-November (SON) 2024 season.
Ginapaabot nga mabatyagan ang La Niña asta sa una nga tatlo ka bulan kang 2025. (AGP/BPS/PIA Antique)
