DIPOLOG CITY, Mar. 23 (PIA) – Nagpahigayon ug Information, Education and Communication (IEC) campaign ug Eco Trail activity ang Provincial Environment and Natural Resources Office (PENRO) Zamboanga del Norte kaniadtong Martes, March 21, sa Cogon Eco-Tourism Park ning lungsod isip pagsaulog sa International Day of Forests.
Ang nasangpit nga selebrasyon, uban sa tema karong tuiga nga “Healthy Forest for Healthy People”, gitambungan sa 31 ka mga personahe sa PENRO nga gipangunahan ni Chief Administrative Officer/Chief, Management Services Division, Sarah I. Zayas, uban sa aktibong partisipasyon sa mga kawani sa Cogon Eco Park ubos sa pagdumala ni Ms. Judelyn Laput.
Si FEO Gladys Aguirre sa Conservation and Development Section sa PENRO ZDN nangulo sa pangampanya sa IEC uban sa paghisgot sa malungtarong pagdumala sa sustainable forest management ingon man sa pagpreserba ug proteksyon niini.
Dugang pa, ang mga personahe misalmot usab sa 5-kilometer adventure trail human sa aktibidad aron mas ma-appreciate pag-ayo ang kanindot sa kalasangan ug mas mapaduol sa labing putli nga porma sa kinaiyahan.
Ang International Day of Forests usa ka kinatibuk-ang selebrasyon nga ginasaulog matag tuig sa ika-21 nga adlaw sa Marso aron sa pagpataas sa kahibalo sa importansya sa kalasangan sa mga tawo ug sa ilang mahinungdanong papel sa environmental sustainability. (NBE/EDT/Joana Marie P. Agnis-OJT/PIA9 Zamboanga del Norte/with reports from DENR-9)
